دولاشة في شارع الحرية

ماو عيّدو بالقدا ولاّ موش لازم

2008-12-08T11:10:00.000-08:00

يا مّيمتي سيدي عربي م اكبر كرشو (و ما اركّو زادة ساعات).توّا ماو كي تبعثو ميساجات زعمة زعمة باش تهنّيو بيهم بمناسبة العيد ماو ع الاقل اقراوهم قبل ما تبعثوهم.شنيّة هاذي كل عام و انتوما حيين بخير? ماو لاباس .لا يزّي حيّين و زيد م الفوق بخير? هكة ?فرد ضربة ?ماو كي قدّر ربي ضمّنو على رواحكم حيّين و بعد يعمل الله.بخير ولاّ موش بخير هاذاكا موضوع اخر
و في انتضار كونو يعملولنا نهار عيد و نهار تبعثو فيه ميساجاتكم باش ما تطيّرليش كيف ليوم وترصّيلي نضيّع التركيز على الشوّاية في جرّة الطمع متاع العريبة (قال شنوّة حيين بخير.تي احمدو ربي اللي نتوما حين)
عيدكم مبروك و ربّي يهدي ما خلق

زريّقة صغيرة....ما فيها باس

2008-11-22T12:39:00.000-08:00

ايّا سيدي قلنا السلام عليكم
عندي مديدة باهية ما عطيتش الكلاط لحتّى حد.لا في الدنيا و لا في المدونة.و بالتالي ليوم قلت واحد مادامو نهيّر سبت و السقنطري لزّني باش نركش تحت البطّانيّة, مافيها باس ندزّولها "بوسط" نفشّ بيه غيضي في العالم الافتراضي و يعمل الله دليل في العالم الحقيقي
و الضحية المرة هاذي هو سي خالد حسني اللي الحق متاع ربي يستاهل باش واحد يعطيه على راسو على خاطرو انا واحد من ناس كلا علا قلبي و شرب.و انا خوكم دمّي سخون و ما نحملش شكون يكسّرلي الباطاطا
تي ماو قالولك في الجرايد الكل يزّي يا سي خالد راك كثّرتلها شوية. اما الله غالب .احنا العريبة ما نعرفوه بقري كان بالكرشة.يعني يلزم واحد يجي يقلّو يا قرضة عفّ علينا و نفّسنا فمّاش ما يفهم روحو و يخطانا لله في سبيل الله على خاطر انا واحد من ناس فين نحل التلفزة نلقاه في خليقتي يحكي هو و هاك ال4 ولاّ 5 كشخ على صبابط الملاعبية متاع الفحص كيفاش مقطّعين ولاّ على نقبة في كلسيطة متاع "الرّاماسور" متاع البقلاوة.في بالنا رتحنا من هاك المحامي ياخي هاو جانا ما اتعس.ناس بكري يقلّك: شدّ مشومك لا يجيك ما اشوم.توّا باللاهي قولولي , ياخي الكورة متاعنا تتطلب باش 5 كشخ يقعدو 3 سوايع كل جمعة وهوما يحللو و يناقشو و يهزّو و يسبطو... ? تي ماو 4 دبابز و 800 عركة و 20 اربيتر في السبيطار و سيّبو داخ
بيني و بينكم انا فاهمو سي خالد حسني.يحب " الزبدة و فلوس الزبدة" كيف ما يقول الفرانصاوي , ولاّ زادة كيف ما يقول العربي (و يضهرلي اللي التعبير العربي في الحالة هاذي اقرب للواقع) : "كسكسيه و ز*كت بوه".و هاو باش نقوللكم علاش.توّا هو كي ما فلح في حتّى جمعية و الجمعيّة اللي يشدّها سعدها يتكب , يقلّك علاش وجيعة الرّاس الزايدة .3سوايع هزّان و نفضان في حنبعل و فليساتو في مكتوبو لا "اونترانمون" كل يوم لا "ستاجات" و لا هم يحزنون.ايه ولكن ياسي خالد كان على حسابي انا و الناس اللي كيفي... السماح.هاذا شي ما قالش بيه ربي

العالم في ازمة حقيقية و ربي يفرّج عليه

2008-10-12T06:00:00.000-07:00

تي هاي كلات بعضها.اما المرّة هاذي يضهرلي الحكاية بلمنجدّ ماهيش تفدليكة.بعد اللي الطشّ وصل حتى للبلوغوسفير.خوكم حلّيت كي الناس الملاح قلت نلقاشي "بوسط" ولاّ ثنين نوسّع عليهم بالي نلقى الدنيا قايمة و قاعدة.و انا خوكم كي الاطرش في الزفّة لا في بالي لا في درايا. وهي طلعت قالّك العالم في ازمة مالية كبيرة ياسر و قالّك زادة اللي ها الازمة هاذي باش تبرّك الاقتصاد متاع باااااااارشة بلدان.و اهوكة الوخيّان المدونين اللي هاذا طاح يحلل و يناقش و يهزّ منّا و يحطّ من غادي.حاسيلو شقلالة كبيرة.الاّ انا خوكم فرايجي في النازلة
اوّلا الساعة ها الازمة المالية ما فيباليش بيها من اصلو على خاطر العطّارة متاع الحومة على حسب ما نعرف ما زادوش في الاسوام.ثانيا انا خوكم اموري تاعبة ياسر في حكاية الفلوس و الاقتصاد متاعي ما يتاثّرش لا من قريب و لا من بعيد لا بازمات و لا هم يحزنون و السبب بسيط ياسر.توّا كي الاقتصاد العالمي سعدو يتكبّ و الدنيا تخلى و جماعة البورصة ريوسهم تتعرّى ماو الشايب وقتها يولّي ينقّصلي في هاك الزوز فرنك اللّي يعطيني فيهم كل راس شهر.اييييه متفاهمين.و لكن اذا ينقصّلي فيهم يولّيو ....حتّى شي.تي بربّي قدّاش هوما باش ينقّص فيهم
و لذا انا نطمّنكم من توّا و نقوللكم تهنّاو. الحومة بخير و خوكم ولد الحومة بخير و الازمة هاذي ماهيش باش تخلطلنا.و مادامها ماهيش باش تخلطلنا فليذهب الجميع الى الجحيم .

و طزّ في...ا

الدايم ربي يا فطّارة

2008-10-02T09:16:00.000-07:00

تحبّو الرسمي?
"البوسط" هاذا كتبتو تطيير ملام لا اكثر لا اقل, و ماخذة خاطر في برشة قرّاء اوفياء قلت ما يجيش ما نعيّدوش عليهم على خاطر م اللي كبرت ع المهبة (اوبالاحرى م اللي الكبار متاع العايلة ولاّو يسخايلوني كبرت ع المهبة) العيد الصغير ولاّ يضهرلي نهار عادي ياسر.هو كي تجي تشوف هذا تقتاقو و مازال فلاّقو. على خاطر عويّمين تلاثة اخرين نولّي انا بيدي نعطي المهبة.وقتها عاد خوكم ندوّرها تكتيك اخر و انا متاكد كونو فمّا منكم شكون تبّعو على خاطرو "ايفيكاس" ياسر و ساهل ياسر: نغمّ على راسي و نرقد.و هكّاكة حتى فرخ ما يجيني يقلّي عيدك مبروك و يبدى يقحرلي على جنب.و زيد من هوني لاك الوقت هاذاكا المفرخ تولّي تطلب الدوفيز.ما عادش يلعّبهم الدينار متاعنا

حاسيلو.جاب ربي فمّا البقلاوة و كعك الورقة .ما كانش راو العيد تعدّى سلاطة

ايّا ياجماعة كل عام و انتوما حيين بخير

كل عام و دولاشتي حيّة بخير

2008-09-19T07:28:00.000-07:00

ايّا صحة شريبتكم
ليوم نحتفل بمرور عام على اول تدوينة ليّا في البلوغ.عام كامل و انا نهز و ننفض: نسب هذا,و ننّبر على لاخر, نعفس في هاذيكا, و ندخل ركبة في لخرى. و انتوما تقراو و تميّلو في ريوسكم
توّا عام كامل م اللي حليت ها المحيّل هاذا باش نفرغ فيه قلبي و نوسع فيه بالي من غير ما حد يقلّقني ولا يقعد يغزرلي على جنب تقولش عليه عامل عليّا مزية.والحقيقة العام هاذا تعرفت فيه ع "البلوغوسفير" بكل ما فيها من هزّان و نفضان هي زادة (و يضهرلي الهزان و النفضان حاجة تجري في دمّنا احنا التوانسة.لا محالة هو في كل الحالات يقعد خير من هزّأن حاجات اخرى لاقدّر الله).اي عاد قلتلكم في العام هاذا تعرّفت فيه ع "البلوغوسفير" و على برشة مدونين ناس ملاح و بااااااااارشة موش ناس ملاح , كتبت فيه 70 بوسط ,و زاروني فيه 4071 رقبة (قولو تبارك الله) م العالم اجمع (حتى من اسرائيل يا بو قلب )ا
يعني تنجّمو تقولو تجربة تدوينية ماهيش دونية.نشا الله بركة ما نكونش عملت الدوانة معا حتّى حد.ما يغرّكمش الشي اللي نكتب فيه.انا راني وليّد عاقل نشرّه و دوبي دوب روحي و نمشي قد قد.لا هكة لا هكة."دايور" يضهرلي كان صدّقني ربي انا اصغر مدوّن في "البلوغوسفير". و مادام حكيت على روحي, فمّا برشة يقراولي و ما يعرفونيش.يا سيدي انا طالب تونسي (بكل ما تنجم توحيلكم بيه كلمة طالب من ... ) ناقم ع الكار الصفرة و الميترو لخضر و كان نلقى نهبطلهم راس في زوز."سيرتو"هاك الاخضر الطويل ولد الكلبة (اهوكة قلت الكلبة موش حاجة اخرى).الله لا تخلّصلو وحلة بجاه سيدي رمضان.اما زادة من ناحية اخرى انا انسان كيوفي الى اقصى الدرجات.وشعاري في الحياة :اذا لقيت الزهو و الطرب لا تبدّلو لا بشقا و لا بتعب
يضهرلي وقيت على طرح "رامي".ايّا مالا انّستو يا جماعة

و نشا الله كل عام و احنا ندولشو في شارع الحرية

تخنتيبة متاع واحد يحرر في الوقت

2008-09-13T09:29:00.000-07:00

اييييييه.يا حسرة كي كنت باش نحرر الوقت في سيدي رمضان ندورها شليلة و مليلة:المدينة و الربطين.و نبدى خوكم نتشهّى و نعاود.ايترة لبن م المرشي سونترال,رطيّل مقروض من باب منارة, كعيبات وذنين القاضي م الحلفاوين ,خبيزتين سخونين من كوشة الصبّاغين ,و من بعد نعمل طلّة ع البطحا نتفرّج في طريّح سخون حتّى لين يقول الله اكبر نروّح خوكم للدّار في يدّي الخيرات السّبعة ديراكت نغطس في صحفة الشربة ما نهز راسي كان ما تولّي تلمع كاينّي مغسولة جديدة.وقتها نتنهنه و نحل فلسة السروال
وينهم هاك الايّامات? رمضان السنا خوكم خرجت نهار للعطار باش نجيب خبزة لعبت عليا الدوخة وكشاكشي خرجت تقولش كنت في الصحرا.يا ممّيمتي ملاّ سخانة ! السماح.اي عاد اش لزّ حمّا يرقص? موش الواحد يركش على رويحتو في الدار خير? من سيت ل سيت و من شان لشان ?هوما يقولو عملوه الحضر و وحلو فيه -حاشاكم- البقر.اما ميسالش .اما خير ولاّ واحد يضرب بقلة ترصّيلو لا يزّي ريقو شايح و زيد مخّو رايب م الفوق? ا ي عاد ليوم قلت اهوكة حاجة و حويجة .نخنتبو شويّة في المدونة منّي نحرّر الوقت و منّي نطيّر منكم وحشة على خاطر عندي مديدة ما كتبتش.تعرفوني ما نصبرش عليكم
مانيش باش نطوّل عليكم على خاطر نعرف اللي في رمضان النّاس الكل خلاقها في وذنها و تستنّا في كلمة الله اكبر بالدقيقة و الدّرج باش تفتّق مواهبها و تمارس الرياضة الشعبية الاولى في تونس:التمخميخ

ايّا هاو يذّن.ايّا توّا مالا نقوللكم شاهية طيبة و اللّي كنت باش نقولو في البوست هاذا تو نقولو مرّة اخرى.ماكم تعرفو.اللاّزم لازم.نخاف لا صحفة الشربة تاخذ في خاطرها

شاي الله ولاي الله

2008-09-03T10:00:00.000-07:00

يا جماعة فما معجزة صارت ليّامات لخّرة و احنا ماناش فايقين.و راس اللي شواتلي الكبيدة كيما نحكي معاكم.و اللي ما عندوش شاهد كذّاب.هاو الشاهد هنا
انا الحقيقة ما نّجمش ما نعلّقش على حاجة كيف هاذي.قلبي ما يعطينيش
مشات يا بو قلب.وقفت على ساقيها.
هاذم ماهمشي هاك العزّامة البودورو اللي معبّين الجرايد و فين تحل جريدة في بالك باش توسّع بالك ترصّيلك تاخو في دوا الاعصاب.لا لا.هاذا سيدي تامر بيه و ما ادراك .قالّك تبارك الله عليه.يدّو تجمّد الما
بيان سور.بعد اللي الطفلة معاقة وقفت على ساقيها يا بو قلب.اش مازل فيها تره
انا غدوة نمشيلو حتى لمصر كان لزم.و نقلّو يا سيدي تامر بيه نجّحني يا سيدي تامر بيه ماني وخيّك انفعني ببركتك و هبّط عليّا حتّى خمسة مياة مليار نعاون بيهم روحي. راني وخيّك نهزّ ساق تغرق لخرى و الكريديات كثرت عليّا و انا خوك نشهق ما نلحق

يا سيدي تامر بيه وخي

حتى الفايس بوك رزاونا فيه

2008-08-20T15:50:00.000-07:00

فوالا.و اللاّهي شمّيتها قارصة م الاوّل.م اللّي دخلو هاك الكعبتين و كعبة اللي جايبين فيها زعمة زعمة خشان ياسر و يفهمولها في السياسة و قال شنوّة باش يجيبو الصيد من وذنو.تي عاد هام الخوانجية طلعو فيهم الهون.ع الاقل داخلين ببّوشتهم و يصنعو في قنيبلات على رويحاتهم لا قلّقونا لا قلّقناهم.تفرهدتو توّا? امشيو شوفو" فوروم" متاع طبخ توّة انشرو فيه" افكاركم التنويرية العضيمة". و قيلونا لله في سبيل الله.انا الحقيقة ما نلومش على عمّار ال404 على خاطر عندو الحق كيف يرى العريبة تهز و تنفض و اللي هاذا يحب يولّي" شيغيفارا" باش يعمل هكة و حتى اكثر."بيان سور". مادام الشعب الكلّو ولّى متخرج من كلية الحقوق و العلوم السياسية متاع القهوة متاع الحومة.و فلان قال و فلانة عملت و لخرين قمبلو على لخرين وهي ماشية هكّاكة...و النتيجة: نمشيو احنا في الساقين.ياخويا اشنوة ذنبي انا و احد من ناس دوبي دوب روحي نمشي الحيط الحيط لا قلّقت حد لا درت بحد لا دقّيت على باب حد?لازم تمرّوهالي الانترنات?ايّا سيدي هاو بطّلناها باش تتفرهدو

ياخويا ماو قالولكم خوذو حرية التعبير. اي عبّرو على رواحكم, فرغو قلوبكم ,فتّقو مواهبكم, اما ياخويا زادة فمّا بلايص خاطينكم ماذابيكم ما تحشيوش خشوماتكم (ولا اي حاجة اخرى) فيهم.ساهلة ياسر.ولاّ الحاجة اللي ما تعرفوهاش هاذيكة اللي تحلى في عينيكم وتولّي فيها العسل?تتبعو في القورّة? القورّة ياخويا فايتينكم بالاف السنين تحضّر و ما وصلو ليوم للي وصلولو كان ما ولاو عندهم عباد تعرف توصّل فكرتها باحترام و بوعي و و و و ...موش بعباد تحكي في التراكن ولّي متخبية ورا كلافيي.قالّو حرية التعبير قالّو ريق بارد.هاني انا مثلا نمارس في حريّة التنبير.و اللاهي لاهي دونيّة بالكل.اهوكة الواحد ينبّر و يموخور و عامل كيف على نفسو.لا تسكّرلي لا نسكّرلك. و ربّي يفتحها في وجوهنا الناس الكل(الاّ هاك الجميعة اللي سكّرولنا الفايس بوك على خطرهم.راهم كلاو على قلبي و شربو.و المجراب تهمزو مرافقو).اهوكة توّة عاد لا فايس بوك لا فايس امّك.شوفو بلاصة اخرى اشطحو فيها

محلاها حماة الحمى في بلاد الشناوة

2008-08-17T12:27:00.000-07:00

على قد ما كانت تطيرهالي كل صباح في المكتب و من بعد في الكولاج و من بعد في الليسي و انا نبدا نسمع فيها و نتثاوب و باعثها طول و عرض على قد ما قشعرتلي لحمي ليوم الصباح

حماة الحمى يا حماة الحما: برجوليّة ما ابنّ دين امّها و محلاها

ما خص المشنوق كان ماكلة الحلوى

2008-08-16T02:47:00.000-07:00

ايّا سيدي اااااااه.ارتيكل يعمل ستة و ستين كيف طحت عليه بالصدفة في انترنات

م العنوان تفهم كل شي.قالك يا سيدي بن سيدي: العراق: عاطل انجبت زوجته 6 توائم يطالب الحكومة برعايتهم

توّة 6 توائم و فهمناها, اما الحكومة انا واحد من ناس ما عرفتش على اناهي حكومة يحكي السيد.و زيد كي هوبطّال و سعدو مكبوب فاش قام عليه يجيب في 6 توائم فرد ضربة.تقولولي هاذاكا حكم ربي و الراجل الله غالب "فحل" فوق اللازم بشوية.ايييه.اما" الحكومة" ولو اني مافيباليش اللي فما حكومة في العراق. الله غالب ما نتبعش الاخبار. الحكومة جابتّو و نساتو باش تتلهالو بفروخو? هو يجربع و" الحكومة" تربي? ااااااااه, بالكشي يحكي ع الحكومة لمريكانية.هكّا نمشي معاك و نعطيك وذني.ياخي عاملين فيهم شويّة جماعة العراق? باش يكيدهم اليسد هاذا و المفرخ و امهم?تي لا يا راجل. ما ضاهرلي

مدونة في حداد على روح الشاعر محمود درويش

2008-08-09T13:10:00.000-07:00

في شهر آذار، في سنة الانتفاضة

قالت لنا الأرض,أسرارها الدموية

في شهر آذار مرت أمام البنفسج والبندقية خمس بنات

وقفن على باب مدرسة ابتدائية

واشتعلن مع الورد و الزعتر البلدي

افتتحن نشيد التراب. دخلن العناق النهائي

آذار يأتي إلى الأرض من باطن الأرض ياتي

ومن رقصة الفتيات- البنفسج مال قليلا

ليعبر صوت البنات

العصافير مدت مناقيرهافي اتجاه النشيد وقلبي

أنا الأرض و الأرض أنا

تدوينة من وحي كاس الحليب متاع فطور الصباح

2008-07-30T05:21:00.000-07:00

باش نقعد باقي في نفس اطار التدوينة اللي فاتت و اللي الحقيقة التفاعل معاها انا واحد من ناس بهّتني.اي عاد قلت مادام الشعب يحب اللّعب ما فيها باس.و مادام الصدر الرحب طلع يهم الناس الكل (موش كان انا بركة) ما نجّمو كان نرحّبو بيه.و كيف ما يقولو: الصدر اللي ما يجيبش ميداليّات ,لا خير فيه
اي عاد قلتلكم بمناسبة الحديث على الصدر الرحب ما فهمتش كيفاش بالرغم م الطاقات اللّي عنّا الكل في حلق الواد وفي غيرها من المدن التونسية الكل ,ما فهمتش كيفاش نوصلو نطيحو في ازمة متاع حليب كيفما اللي صارتلنا السنا في الشتا.كان تتذكروشي وقتها العطّار كيف تدخلّو و يبدى "ديجا" يعرفك ,يقلّك ما عنديش حليب ,و من بعد يجبدك في تركينة و يقرطسلك باكو الحليب في كاغط متاع جريدة و يقلّك:فيسع روّح و رد بالك يراك حد.و تبدى انتي مروّح و مخبّي باكو الحليب تحت ضبّوطك تقولش عليك معدّي كيلو غبرة م الديوانة
وقتها نتذكر زادة في كارفور العباد يعطيو في الرشوة للخدّامة باش يخليولهم ستيكة ولاّ ثنين على جنب
و ما دام حكيت ع الحليب برّة نعملو درس صغير ع الحليب فرد مرة.انا صرفت صرفت.يا سيدي الحليب و مشتقاتو دخلو بقوة في لوغة الشباب متاع ليوم.يقلّك فلان حلّب بيّا.ولاّ زادة حلّبت بفلان يعمل في كذا و كذا.بمعنى فقت بيه ولاّ فطنت بيه.و الفعل معمول بيه ياسر و مصادقين عليه تقريبا "لي جون" الكل.و يتصرّف في الاوقات الكل زادة حلّب يحلّب تحليبا فهو محلّب
يضهرلي حلّبتو بيّا قاعد نهز و نسبط...ايّا يزّي مالا.فيه البركة

تبارك الله على بنات حلق الواد

2008-07-28T07:56:00.000-07:00

تبارك الله على بنات حلق الواد.خمسة و خميس ع الكفاءات التونسية.لا محالة تبارك الله ع البنات التوانسة الكل.اما بالاخص بنات حلق الواد
بنات حلق الواد يا سيدي عندهم صيفة رحابة صدر ما راتهاش عيني.الوحدة تتعدى قدّامك و انتي تبدى تصلّي ع النبي و تعاود "تلمون"صدرها رحب.بالعمل م اللي حطيت تر*تي في التيراس متاع القهوة ما هزّيتها كان عقاب الليل.و انا هاني شيّعت هاذي هاني جبت لخرى (بعينيّا بركة) وهوما عيني ما تضرّهم من كثرة رحابة الصدر متاعهم مراولهم قريب تتقطّع.حتّى هي قالّك سنة الحوار معا الشباب.بالطبيعة.ما دام الشباب و خاصة الشابّات عندهم ها القدر الكبير من رحابة الصدر نتصور اللي باش نخرجو بحاجة( الله اعلم شنية الحاجة اما المفيد حاجة و اكهو(

عريان ال** في يدّو خاتم

2008-07-18T11:02:00.000-07:00

هاذي عاد قالتلهم اسكتو.بربّي واحد فيكم يقرصني بالكشي انا نحلم.اسمع يا لّي ما سمعتش.اش قالّك اش قال عليك "50سنت"جاي لتونس باش يعمل حفلة نهار 14 اوت في ستاد المنزه.هاذاكا اللّي كان ناقصنا احنا.اللّي خلاّوه المصاروة و اللبنانيّين زيزي و كوكو و زازا يكمّلو سي 50 فرنك.حتّى كان جا يسواهم ال50فرنك.و اللاهي 50 فرنك و ياسر فيه
انا خبر كيف هكّة بصراحة يروّبلي دمّي و اقل ما نّجم نقول عليه هو كونو كارثة.و موش على خاطر موزيكتو ما تتماشاش معا ذوقي المتواضع (ولاّ المضعضع) .بالعكس.انا معا تعدد الاذواق ولكن كيف يبدى الشي اللي يعمل فيه ننجمو نسمّيوه موزيكا .بينما اللي يعمل فيه سي 50 فرنك يجي كل شي كان موزيكا.باللاّهي كان انا غالط قولولي.الرّاجل عندو غناية و نص عامللهم زوز كليبات فيهم ميتين طفلة المتدينة فيهم لابسة "ميني جوب"و الباقي لابسين "بيكينيات" (جمع بيكيني) متاع بحر .اسمها موزيكا هاذي? واللّي فاتك اغرب .البيكيني يلبسوه في الصالة ,في الكوجينة ,في بيت البانو ,في بيت المونة ,في المقصورة ...حاسيلو في البلايص الكل .و هنا باللاّهي حبّيت نحل قوس صغير: كان فمّا واحد م الوخيّان القرّاء عايش في امريكيا ينجّمشي يجاوبني. ياخي النسا غادي في امريكيا يدورو في البلايص الكل هكّاكة? يعني بكلصون و بوسطو? كان هكّا خلّي الواحد يمشي لامريكيا يتفرهد شويّة.و ما يجيكش عجب نولّي نخمم نستحسن.مادام الحكاية هكّة
المهم.نرجعو لموضوع هدرتنا اللي هو "50سنت" ربّي يباركلنا فيه.توّة كيف باش نجيبوه لتونس ماهو على اساس نجم عالمي كبير و ...و باش يولّي قدوة للشباب وهات من اك اللاّوي.ايه و لكن السيد اللّي معدّيه ربطيّات في حبوسات امريكيا اكثر م اللّي عدّاه لبرّة.اش عملنا و جا مليح? باهي يا سيدي نمشي معاكم لما ابعد.ها النجم العالمي الكبير كيف باش نجيبوه قدّاش باش نخلّصوه ? ولاّ بالكشي جاي على سواد عينينا تقلّي انتي تو يتحاماو فيه الكوكا و التونيزيانا و التيليكوم كل وحدة تعطيه اللّي كتب تو يخلص و حمل الجماعة ريش كيف ما يقولو .اييه متفاهمين .و لكن الفلوس اللّي باش يضربهم على قلبو (واللي الحقيقة انا واحد من ناس حاسدو فيهم) موش كان عملنا بيهم حاجة تصلح خيرلنا?موش كان عطيناهم لادارة فستيفال الجاز متاع طبرقة خير? و هوما يشهقو ما يلحقو وفي الاخر سلّمو و قالو بلاش بيه هال الفستيفال. عندهم الحق.مادام التونيزيانا و التيليكوم لايزّي يقلبو فينا و عينينا تغزر و زيد يصرفو ع الزنوس المقلّبة.فين ماشية فلوسك يا عمّار, في الصفيحة و المسمار

ربي يهدي (ولو انو ع المعدّل هاذا يا ذنوبي كان بش يهدي)ا

على خاطر موش كل واحد يحك راسو يولّي منشّط

2008-07-12T15:40:00.000-07:00

يضهرلي الشاهية متاع الكتيبة تحلّت (و ربي تستر).حتّى هي سهرية سبت,و زيد الحال صيف.هو كي تجي تشوف مانيش مستانس نروّح الوقيّت هاذا, اما ليوم قلت ما فيها باس ناخذو بخاطر العزوزة .كل يوم نروّح نلقاها تضرب فيه خميري و من غدوة تقلّي:" ياخي روّحت مّخر لبارح ?تحيّرنا عليك يا وليدي".اي عاد ليوم قلت موش لازم نحيرها كيف كل يوم.مشيت يا سيدي بن سيدي للمرسى عملت قهيوة خفيفة, و النسمة تمروح عليّا اللهم صلّي ع النبي ,و انا خوكم "طرونكيل"عامل بون كيف.شاي الله سيدي عبد العزيز.و معا نصف الليل خوكم شديت الثنيّة وحيدة وحيدة كي الوليّد العاقل.وصلت للدار نلقى الجماعة ناصبين على سهرية السبت متاع حنبعل.و تاي بالبندق يا بمبك يا بمبك.ايّا قعدت نتفرّج.هي "الايميسيون" ماهيش دونيّة.اما المرا "المنشطة" غلّبت عليّا.اهيكة خااااااايبة حاشى خليقة ربي و حاطة كيلوات ماكياج على و جّها.كان صدقني ربي اسمها عفاف ولاّ حاجة هكا.حاسيلو اهوكة كان تحبّو اعملو طلة ع السّيت متاع حنبعل تو تشوفو الخنّار و ها المرا اللّي عملت العار.الحق موش فيها كي تجي تشوف.الحق في اللي عطاها الميكرو و كذب عليها و قالها راك منشّطة.وهي حتّى منشطة متاع روضة ما تجيش.اما الله غالب.في و قتنا توّة سوّد وجهك و ولّي فحّام.معناها الناس اللي كيف ها المخلوقة هاذي مازالو باش ياخذو بايهم في امثالي و امثالكم.انا ما غايضني في الحكاية كان اسامة فرحات و هاك الطفلة اللي جابها معاه(نسيت حتى اسمها)هي لامحالة حليلتها و صوتها موش دوني و زيد غنّات "ستيفي وندر" اما اللي بهّتني هو كونها عاملة "لونتي" زرق.و يضهرلي وحدة فيهم طاحتلها.قعدت عين بعين: عين زرقة و عين كحلة .حاسيلو خرجت اخيب شويييّة م العبيثة.ما نعرفش يمكن الفازة هاذي لمّوضة جديدة.انا توّة ما عاد نستغرب شي م المفرخ متاع توّة.بعد اللّي قالّك السراول الطايحين "خارجين السنا" .و اللاّهي ما فمّا خارج كان عقولاتكم
اي عاد نرجعو لموضوعنا.للّا عفاف تسال في اسامة فرحات (انا واحد من ناس الراجل هاذا نحترمو ياسر ك موزيكاتي)في اسئلة ابهم من صبّاتي و هو مسكين م الاوّل يجاوب فيها على قد عقلهاو بعد قعد يحكيلها ع البلوز و الجاز و هي تعمل هكّة براسها و ماهي فاهمة شي.كلامك معا اللي ما يفهمكش ينقّص م الاعمار يا سي اسامة.حاسيلو مقاتل متاع ضحك و غزّول هاك المرا

تقولولي علاش هكاكة وليّة مسكينة سلختها بابرة.لا ياسيدي.و هي ميسالش كي تطيّرلي كيفي?الله غالب.انا دمّي سخون و ما نحملش العوج و خاصّة البهامة.و كيف ما يقول المثل: اللي جابتّو ساقيه العصا على تر*يه

العصافر و البلوغوسفار و مدونتي الجديدة لاحبّاء الموزيكا المزيانة

2008-07-10T02:51:00.000-07:00

في يوم من ايام الصيف الحارقة و السماء زرقاء(في لون برشة عباد)و العصافير تغرّد على راس جد والدين بوها الكلب.وعلى ذكر العصافر,هي الحيوانات الوحيدة اللي تطيّرهالي: من ارض ربّي لكل ما اختارت كان شبّاكي انا باش تبني فوقو العش متاعها و تسمعني كل يوم السمفونيّة اللي تقيّمني من نومي.مازالت كان العصافر ما خذاتش في باي.اي عاد ليوم قلت برّا ندزّولها تدوينة.ما فيها باس
باش نبدى منين يلزمني نبدى و نشكر الجماعة اللي نشدو عليّا و على المدونة في المدة اللّي تعدات الكل.اهوكة احنا اولاد الرّبط ما ننكروش العشرة.هو كي تجي تشوف حتّى ولو ما كتبتش اما اهوكة قعدت نتبّع من بعيد لبعيد في الشي اللي قاعد يصير في البلوغوسفار و اللّي الحقيقة ما شجعنيش بالكل ع الكتيبة.وليت ندخل تقولش عليّا داخل للبطحا متاع الحومة:الناس الكل تسب في الناس الكل (الّا ما رحم ربك بالطبيعة )وهاك الكعبتين و كعبة متاع العلمانية عاملين فيها طز حكمة و مقيّمين فيها لاذان و جماعة "المسلمين" ما كانوش م العاكسين و قالّك يحبّو يقيمو عليهم الحد.قريب باش يولّي فيلم الرسالة ع البلوغوسفار.(كم عددهم?)اي عاد اش لزّ حمّة يرقص.ماو واحد يبعد ع الشر و يغنّيلو.و بعد هاذا و دونو ناس بكري يرحمهم قالو:تبديل السروج فيه راحة.و الواحد ماذا بيه يكرم لحيتو بيدو(حتّى كان يبدى ما عندوش لحية كيفي )
و كيفما تعرفو زادة احنا اولاد الرّبط ما نجيوش يدينا فارغة.المرّة هاذي جبتلكم معايا مدونّتي الجديدة بارازيت.بارازيت هاذا يا سيدي كيف ما تقول انتي عجّة. اما موش بالمخ.هاذي عجة بال"فلامنكو".ولّا شكشوكة بال"بسيكاداليك" ولّا مدفونة مفوّحة بال"موزيكا الهندية "حاسيلو ف الاخر جات حاجة اندراكيفاش:برشة موزيكات وبرشة اصوات مخلّطين ما ينجمو يكونو كان "تمخوير" اهوكة كان حبّيتو تبدلو شويّة الجو انزلو هنا و اتذكروني

كيفما قالت فيروز: بحبّك يا لبنان

2008-05-11T23:50:00.000-07:00

ايواااااه.هاي كلات بعضها.و اللاهي شميتها قارصة من هاك العام.قلت مادام الجماعة هابطين ريش و داخلين في بعضهم ركبة و اللي هاذا يستنّى في لاخر في الدورة يا ذنوبي كان الحكاية باش توفى على خير." افكتيفمون" اوّل فرصة جات الجميّعة قيّمو فيها لاذان و قلبو الدنيا سافيها على عاليها

اكيد كونكم فهمتو اللّي انا نحكي على لبنان و التخربيقة اللي صايرة فيها ها الايامات.ولو انّو في الحقيقة اوموري في السياسة ماهيش لاك الكل و سياستي الوحيدة هي" اخط راسي و اضرب".اما اهوكة الواحد كي يرا حاجة هكّا في التلفزة تبربشلو شويّة" زعمة زعمة" الضمير العربي متاعو( اللّي الحقيقة عندي انا ما نعرفش عليه يا راقد على طول يا مات ضربة وحدة).يعني تنجم تقول انا توّة كيفما هاك اللي داخل لسوق البصّاصين بلا *رمة

هو كي تجي تشوف البوست هاذا ما كتبتوش باش نورّيكم اللّي انا غايضتني لبنان ولاّ باش نقول اللي انا قعدت اكا حدّي عليها.اما كتبتو باش نرضي صفة مهمة عندي:سميوها حب اطّلاع, سمّيوها تنسنيس, تبتبيت, اللي يضهرلكم

يا خويا فمّاشي واحد م القرّاء الافاضل فاهم الحكاية شنيّة? يعمل اكبر مزية يفهمني: السنيورة و جنبلاط و دراشكونو لاخر علاش يتعاركو? علاش شادّين في خناق بعضهم نهار و ليل? وهوما هاو فلان عمل هاو لاخر قال... و" الفيوتشر" تعطيك خبر تبدّل" الال بي سي" يقولولك لا راهو غالط, تزيد تبدّل" المنار" يقولولك راهم الزوز غالطين.و الصحيح يجيبو ربي

و حتى ع الانترنات حتى حد ما يعطيك صرف من عدل. الحاجة الوحيدة اللي متفاهمين عليها النّاس الكل( و اللّي بهّتتني انا )هي اللّي كونو عدد السكان في لبنان يحوّس في ال4 ملاين.4ملاين يا بو قلب.و عاملين هاذا الكل.بالسنيورة بجنبلاط بنصر الله بميشال عون بالشيعة بالسنة بالمسيح بالبنات القنابل متاعهم 4ملاين اكهو? تي ما يجيوش حتى الشطر متاعنا. يعني حسب التقريب الكلّهم بكلالهم يجيو قد اللّي طلعو معايا ليوم الصباح في الميترو

تي هام طلعو ماضيين الجماعة

ابشروا يا معشر الحرّاقة

2008-04-26T01:30:00.000-07:00

ابشروا يا معشر الحرّاقة.هاذا النهار اللّي قالتلكم عليه الدقّازة.هاذي حاجة اسمها فلوكة و ريق بارد امسح مات عليها.الحرقة من هنا لقدّام باش تولّي" سانك ايتوال".و ميلانو باش تولّي اقرب من باب الفلّة.و راس اللّي شواتلي الكبيدة كيما نحكي معاكم.يا سيدي علاش نمشيو لبعيد.اللي ما عندوش شاهد كذّاب.اهيكة الخريطة قذّامكم.احكمو و حدكم.و تمشيوشي تقولو مفبركة? هاذيكا عاملينها القورّة بيدهم.قالّك "لافريك" قاعدة تقرب بالشويّة بالشويّة لبلاد العكري( باش ما يفطنوش بيها). يضهرلي فيها حتّى هي فدّت قالت نبدّل الجو شويّة

انا الحقيقة العلماء متاعهم اللي يطلّعو في الحكايات هاذم ينفخولي برشة بلايص في بدني على خاطر كل مرة يطلعولنا بطلعة.في هاو السما فيها نقبة قد السخط, في هاو الدنيا باش توفى عام الفين و درا قدّاش,( و انا امي مازالت ما فرحتش بيّا), في هاو الدنيا سخنت ياسر (هاذي اخر طلعة).اما الحقيقة المرّة هاذي دزّو فازتهم و جابولنا خبيّر يفرّح

ايّا مالا نشا الله نتقابلو على قريب.نعملو صحيّن سباقيتّي في روما

كذبة افريل

2008-04-13T00:32:00.000-07:00

كذبة افريل( او شوطة افريل) م السنن الحميدة اللّي قعدنا محافضين عليها توّة سنايات الله و هذا في الحقيقة موش غريب على ناس تفنى في الكذب و التبلعيط
و لكن انا شخصيا نراها انانية مفرطة منّا تجاه وخيّانّا القورّة.توّة احنا العام 12 شهر و احنا نكذبو و نشوطو و نبصّو( حاشا من يعدي) و شاشية هاذا على راس هاذا و فلان عمل و فلانة قالت.وهوما القورّة مساكن يخدمو على رويحاتهم دابهم داب روحهم لا هزان كلام لا تقلقيل و لا هم يحزنون.و اللاهي انا ساعات نقعد باهت فيهم.نقول كيفاش يعملو نساهم في الحمام? ما عندهمش حارزات? زعمة بلحق يسمعو بالتقلقيل سمعان? سبحانو ربي كيفاش يخلق عباد هكة لا يخبّشو لا يدبّشو
انا نقترح باش نخلّيولهم افريل يكذبو فيه كيما يحبّو و يقعدولنا احنا 11 شهر نقيمو فيهم لاذان براحتنا.اهوكة ع الاقل نعملو فيهم الخيرحتى على رحمة الوالدين باش ربي نهار اخر يرالنا بيه

الى امبراطور الساحل

2008-03-29T05:23:00.000-07:00

الصحفي: انتوما طلبتو حكم اجنبي سي معز? ا

معز دريس: و اللاهي المقابلة تعدات في ظروف طيبة و احنا ما عنا مشكلة معا حتى فريق

الصحفي: اي سي معز. و الحكم الاجنبي انتوما طلبتوه? ا

معز دريس: و اللاهي المباراة كانت طيبة و احنا كفريق النجم الرياضي الساحلي نحبو نشرفو تونس

ياخي ديما ماعندكم مشكلة معا حتى حد و اموركم طيبة و السماء زرقاء و العصافير تزقزق و الدنيا بخير يزينا م الريق يا سي معز راهو ماعادش عنا شكون يرضع في صبعو

كورتنا ما تكب سعدها كان بالزنوس اللي كيفك و بقدرة ربي ماهيش باش تقوملها قايمة مادامو امثالك مكبشين فيها بيديهم و ساقيهم

الطالب التونسي و رؤية شاملة لتحديات المستقبل

2008-03-18T16:34:00.000-07:00

العمل الطلابي (الكلمة هاذي تعجبني ياسر.تضهرلي متاع هاك الناس اللي يعديوهم في الاخبار ويبداو لابسين كوستوم و كرافات و يتكلمو بالعربية القحة(القحة بالشدة فوق الحا و بلاش با.لا ترصيانا في حل و اربط))تي حاسيلو.موش هاذا موضوعنا.اي عاد قلتلكم العمل الطلابي في تونس قاعد يعرف في تطورات كبيرة ياسر و قاعد يواكب في العصر و يتفاعل معا متطوراتو.و الاكيد كونو الناس اللي تاخو الميترو كل صباح قاعدة تواكب في ها العمل الكبير اللي يقومو بيه الطلاب التوانسة

الطالب التونسي فاق اللي "يا كريم متاع الله" و"حويجة لله يرحم بوك" ما عادش توكل الخبز.و حكاية المرايات الكحل ما عادش لاموضة و الناس الكل فاقت بيها.و بالتالي الوصول الى جيب الزوالي ولا كاسح شوية و يلزمو تكتيك جديد.و الطالب التونسي بالطبيعة لقا الحل: زوز باكوات شوينقوم على زوز باكوات موشوار و يبدى من فاقونة لفاقونة في الميترو يتشهلل ويتضومر و زعمة زعمة يبيع في سلعتو. و في اكثر الحالات الناس يعطيوه الفلوس من غير ما ياخذو شي.و سي وخينا يصور الخير و البركة

الابتكارات اللي كيف هاذي ما تنجم كان تعود بالمنفعة على الطالب التونسي.و يا حبذا لو كان الطلبة متاع الجامعة يقتديو بزملائهم الطلبة متاع الميترو و يبتكرولنا فازات جديدة نحلو بيها مشكلة المصروف.انا واحد من ناس الشايب ما يرميلي هاك الزوز فرنك اول كل شهر كان بسيدي و سيدك

اتصالات تونس: الزغاريت اكثر م الكسكسي

2008-02-27T05:07:00.000-08:00

اللي يرا البلايك متاع" البوبليسيتي"متاع اتصالات تونس يقول هاذم عاملين اوفر ما صارش.وين نمشي و صلاح مصدق و هاك القرضة اللي معاه(نسيت اسم جد بوها) في خليقتي.تقولش عليهم يتبعو فيا.انا الحقيقة شكيت.قلت مادام عاملين ها الفوفعة الكل بالكشي الحكاية المرة هاذي تطلع صحيحة و نوليو نتكلمو ف التاليفون بلوشي.ياخي طلعت بيعة مقطعة كي العادة.قالك تنجم تفيكسي فاتورة التاليفون ع السوم اللي تحبو.اووووووووه يا جد بابا.جبتو الصيد من وذنو.حاسيلو كلاونا بالكلام على حكاية افرغ من فارغة.عيطة و شهود على ذبيحة قنفود

لا.واللي فاتك اغرب.قاللك عاملين زادة "تخفيض"لجماعة الانترنات اللي يستعملو فال256و ال512و ال1ميقا.معناها احنا الزواولة متاع ال128 ما عجبناهمش.اشبينا? ما نقابلوش? تي ماو اعملولنا تخفيض حتى بالكذب

ايا سيدي تعرفش كيفاش? موش لازم.و ملا راحة منكم و من تخفيضكم و لا مزية لعربي كلب

قنديل باب منارة

2008-02-18T07:32:00.000-08:00

للي ما يعرفوش: هاذا هو باب منارة.و هاذاكا هو قنديلو (قنديل معناها هاك الامبوبة اللي فوقو) .و للي ما يعرفش زادة : القنديل هاذا يضربو بيه المثل في تونس: يقلك فلان كي قنديل باب منارة.يضوي ع البراني.و السبب بسيط.و هو كونو القنديل هاذا في عوض يضوي على اهل المدينة اللي يدخلو و يسكرو الباب في صورة ما اذا فما خطر فانو يضوي ع الخطر بيدو

حكاية باب منارة و القنديل تنجم ترد على كل المشككين في قيمة البهامة التونسية و خبرتها و تبين بصفة قطعية على كونو الشي يجري في دمنا من وقت اجدادنا(الله يرحمهم الكل و يخفف عليهم التراب الثقيل) اللي بناو الباب و حطو القنديل و ما ننجموش نسلمو فيه

تحيا الهمجية.. يحيا الصولد

2008-02-03T12:15:00.000-08:00

على عكس موسيو روجي لومار اللي يموت و يفنى ع الدفاع.المواطن التونسي التكتيك متاعو واضح و ما عندوش مناش يخاف.المواطن التونسي يلعب الكل في الكل.الهجوم و الهجوم ثم الهجوم على كل انواع المحلات التجارية.المواطن التونسي ع الحس يقسم الباي.و ابوكة يسمع كلمة"صولد" يولي في سينة اخرى و عينيه تحوال.و تقوم عاد لقيامة و يتنطر الشعب الكلو عاري و لابس و يهبط ع الحوانت كي الذبان

ايا توة انا يلزمني نخليكم.ماشي نعمل طلة.نلقاشي حويجة ع الطاير.واحد ياخو بايو معا الخلق.سمعت قالو عاملين صولد هايل في الحوايج

ايا انستو

البندير التونسي فوق الجميع

2008-02-02T02:58:00.000-08:00

في حفل بهيج انتضم مساء امس باحد افخم النزل بالعاصمة توج التونسي بلقب بطولة العالم للعزف على الة البندير.وقد شهدت بطولة هاذا العام منافسة كبيرة من طرف مختلف الدول العربية التي اضهرت بدورها امكانيات رهيبة في عالم التبندير.لكن الخبرة التونسية و المواهب الفذة التي يزخر بها البندير التونسي حسمت الموقف لصالحها ليتربع البندير التونسي مجددا على عرش التبندير في العالم مؤكدا بذلك السيطرة المطلقة التي يفرضها منذ سنوات على هذا الميدان في جميع المستويات

فمبروك للفريق التونسي و العقبة لما اهم.و نشا الله ديما مشرفنا في المحافل الدولية

العروبة و الوفاء للانتاج المحلي

2008-01-18T12:53:00.000-08:00

احنا العرب نراو بالعشرة و ما ننكروش المعروف.صحيح احنا ديما مفرقين كي اولاد الحجلة و عمرنا ما تفاهمنا( و ما نتصورش كان باش يجي نهار و نتفاهمو).اما في الوفاء و الاخلاص عنا ما نقولو في رواحنا.سيرتو كيف تبدى الحكاية عندها علاقة بالمبدعين و العباقرة متاعنا كيما الخوارزمي

قاللك يا سيدي السيد هاذا كان عالم خشين ياسر وقت اللي كانت الدنيا دنيا و كنا احنا العرب الربوبة متاع العالم.وقالك زادة هو اللي اكتشف الصفر. او بالاحرى اكتشفلنا الصفر.ومن وقتها و احنا مسيبين النوامر اللي خلقها ربي الكل و مكبشين في الانتاج المحلي( او الصفر المحلي) و شايخين عليه و حالفين بيمين لا نخرجو منو كي تتطبق السما ع الارض.هاو الوفاء ولا بلاش

هديتي المتواضعة الى موسيو لومار

2008-01-09T02:57:00.000-08:00

الدونتيفريس هاذا هدية مني لموسيو روجي لومار(مدرب المنتخب التونسي لكرة القدم بالنسبة للي ما يعرفوش).اهوكة م البريمة وكي تدور بر تونس الكل ما تلقاش خوه.قالك ضربة ضربة.لا محالة مانيش مستانس لا طاح لا دزوه نقوم نعطي في الكادوات و الناس ياخذوهم هكاكة هناني بناني.اما المرة هاذي قلت احنا ولاد ربط و ما يخرجش علينا نخليو الراجل يمشي لغانا هو و الايكيب ناسيونال متاعنا من غير ما نعطيوه حويجة نعاونوه بيها.الدنيا الكل ماخذة في الخاطر

هو كي تجي تشوف ما نشكش اللي موسيو لومار باش يهز معاه الدونتيفريس متاعو (اللي جابو معاه من فرانسا) اما قلت راهو ما قراش حساب نبيل معلول و الجماعة لخرين.سيرتو اللي هوما في امس الحاجة ليه على خاطر يلزمهم يمضمضو مليح ع الكوب دافريك.وع المعدل هاذا يضهرلي اللي السنا ما ذابيهم يبداو يمضمضو على بكري.خير م اللي ترصيلهم يمضمضو في غانا و يوفالهم الدونتيفريس و ترصيلهم طايحين مونك.و يقعدو مساكن بلاش تمضميض

حاسيلو انا عملت اللي عليا.و هديت الدونتيفريس.بقلب صافي و نية طيبة. و اهوكة ربي يعلم.وراس الما و الملح اللي كليتهم في تونس يا موسيو لومار, وراس ال50مليون اللي تصك فيهم كل شهر, لا فمة خوه ها الدونيفريس

اهوكة انا و التوانسة باش نبداو نمضمضو من توة و انتي دبر راسك

عامكم مبروك

2007-12-31T07:08:00.000-08:00

الدايم ربي.2007 هز شلاقاتو وملاقاتو وقصد ربي.الايام قداش تجري. و احنا نجريو وراها و مكبشين فيها بيدينا و سقينا.وحالفين بالايمانات السبعة لا نفلتوها

المهم.اهوكا ليوم قاطووات و دنيا و شيخات.وفما اللي في الوتلا و اللي في البواتات واللي ما في حالهمش تحت الحيط يعملو في كعبات.و فما زادة اللي على نيتو مسكين و معمل على سهرية قمقومة معا قناة 7 ولا حنبعل و ما يعرفش اش يستنى فيه.و زيد غدوة فيشتة.الناس الكل باش تصبح تفشخ ف النوم .معناها هاذا هو النهار اللي قالت عليه الدقازة.اشطحو و اردحو كيفما يضهرلكم.راهي الدنيا فيها موت.بقلة ليها

انا الحقيقة حبيت نعمل طلة ع الاحداث اللي صارت في 2007 ياخي ما لقيت كان المصايب اللي هابطة علينا كي الشتا.زلازل وصواعق و فياضانات.وحماس تقتل في فتح.وفتح تقتل في حماس.و اسرائيل تقتل فيهم لثنين.خلي عاد العراق ما قال حد لحد.خلي عزاها سكات.الحاجة اللي تهز المورال هي اللي في 2007 عملت المدونة هاذي ربي يفضلهالي و يفضلني ليها باش نمخور فيها كيفما يضهرلي من غير ما حتى حد يبدى يغزرلي على جنب كاينو عامل عليا مزية

حاسيلو نشا الله في 2008 لومور تتفرهد شوية.ولو انو ع المعدل هاذا يا ذنوبي.اما اهوكة واحد يسبق الخير و ربي تستر

ما نحبش نقول كل عام و انتوما حيين بخير على خاطر عندي برشا نقول فيها و الخير ما فماش ريحتو اما نقول عامكم مبروك

بشرى لاصحاب الشيخة

2007-12-30T01:44:00.000-08:00

الى احباء الجعة الممتازة.جبتلكم خبير يعمل ستة و ستين كيف طحت عليه في انترنات قلت نجري نفرح الجماعة و نبشرهم.ايا سيدي ااااه.شد عندك.قاللك:هينكين تشيد معصرة للخمور وتروج لعلامتها التجارية في تونس.معناها ختمت يا بن عروس.ريفيون السنا الشعب التونسي الكل بالعو قنوط( سامحوني في العبارة على خاطر ما لقيتش كلمة اخرى تادي المعنى المطلوب).احنا بماركة وحدة و قريب نهبطو لقشة م السما.خلي كي ولاو زوز.توا تولي منافسة.و ما يجيكش عجب كان تولي الحكاية فيها صولد بمناسبة راس العام.وهاذا الكلو في مصلحة الحريف

عشية سبت ياسر هبال

2007-12-29T15:46:00.000-08:00

في تدوينة ليوم حبيت نعطيكم فكرة على السكر اللي تنجم تركبو قناتنا الوطنية ربي يفضلها( و يسامحها) لعبد ذنبو الوحيد كونو حب يتفرج في ماتش كورة

ايا سيدي عشية سبت و الشتا تجبد خيطين من سما, حطيت تونس 7 كي الناس الملاح باش نتفرج في طرح المكشخة و صفاقس.نلقاهم مازالو يعديو في الاشهار.ومن جملة ما عداو اشهار متاع حفلة سمير الوصيف و حضرة رجال تونس.توة الحضرة و فهمناها.اما بجاه ربي منين جاهم" رجال" تونس? اللي يستغل التراث متاع شعب كامل باش يصور بيه زوز فرنك ماهوش راجل و ما يكسابش ريحة الرجولية.و بالتالي سي توفيق دغمان ماذا بيه يسيب عليه م الريق و ينحيها الجبة وينحي معاها الماسك متاع" التونسي الاصيل".على خاطرنا ماناش سيدي تاتا وموش بالساهل باش واحد استغلالي كيفو يعديها علينا.و اللي قالتلهم اسكتو: اسم العرض" الحلفاوين".مسكينة الحلفاوين.تكب سعدها و قريب نتكبو احنا معاها.كان فيها سيدي علي الرياحي و صليحة و رضا القلعي يصولو و يجولو.وتوا" رجال" (وناكد ع المعقفين) تونس و سمير الوصيف.و برا عاد البومزيود خدام و الشقوفات تتناطر تقولش عليها حرب.واش باش يفضها.موش عيب هاذا? موش شي ينطق م الاجناب? ويحبوني نسكت

نرفض يا سي الكافي.نرفض و نزيد نرفض

ما نطولش عليكم طارتلي و جيت باش نسكر جد بوها التلفزة و من بعد نعلت الشيطان و قلت ما دام الشعب يموت ع الشطيح و الرديح ما عنا ما نعملولو.هاذيكا مغرفتنا اش هزت.و على كل حال واحد يوسع بالو و ما يفلتش طرح سخون كيف هاذا

المهم.الماتش طلع ملذذ.موش سخون كيما تصورتو.اما خير من بلاش.حتى لين جات اللقطة اللي تضرب فيها الملاعبي متاع صفاقس.هي لامحالة تظهر اصابة عادية متاع ملاعبي متاع كورة.اما كيف زدت ثبت فيها ريت القصبة متاع ساقو مقسومة في ثنين.يضهرلي فيهم الجماعة شاهين الهرقمة.انا واحد من ناس حياتي كاملة ناكل فيها بقصبة بقري و ما عمري ما جربتها بقصبة متاع عبد.الحاسيلو جات الطامة و العامة و كلات بعضها بونية و كف ومن بعد جات كرهبة الحماية هزت الملاعبي هو و شطر ساقو و طارو بيهم للكلينيك.ايا قلنا ما صار باس و انشا الله لاباس و نرجعو للماتش متاعنا.و اذا بيهم الملاعبية متاع صفاقس لا طاح لا دزوه قالك ماناش مكملين الماتش.علاش? كيفاش? الله اعلم.ناس قاصة تساكر و ناس الله اعلم بيها اش عملت باش تتفرج.و الجماعة حلفو بيمين ع الماتش لا يكملوه

ما نطولش عليكم.سكرت التلفزة و رقدت.و ق ناتنا امسح مات عليها.و شعفة يا داود كان مازلت نعاود

التدوينة السوداء

2007-12-24T00:54:00.000-08:00

على عكس السقنطري متاع ديسمبر اللي لزنا باش نعملو"ركشة جماعية تحت البطانية",الجو في البلوقوسفير سخون ها الايامات والمدونين التوانسة هازين خشمهم على الرقابة (اللي على حسب ما فهمت) حجبت المدونة متاع خونا فري راس".معناها الراجل حاط دم قلبو في مدونة باتت ما صبحت.وجا يضرب عليها ما لقاش ريحتها.ارض و كانتلها بلاعة.لا السما قالت ريت و لا لرض قالت ريت.معناها سي" فري راس" قالولو: ودع حبيبك وانسا هواه.انا الحقيقة مانيش ضد حجب المدونات اذا كان خرجت ع الثنية وبدات تسيب ف الركاكة.اما خونا سي فري راس موش في وجهو, ولد عايلة و لا عملت لا يدو لا ساقو.علاش تقصفولو مدونتو وترصيلو يغني: ضلموني
وعلى عكس التدوينة البيضاء, تدوينتي ليوم سوداء (و كان لقيت لون اغمق م الاكحل راني قلتو) و السبب اللي خلاني نكتبها هو كوني تعديت بالصدفة على قناة7 نلقاهم يعديو في مسلسل الخطاب ع الباب.لامحالة انا حفضتو من كثرة ما عاودوه (وموش محبة فيه اما على خاطر ما لقاو ما يعديو) اما زادة المسلسل هذا واحد من ناس نعتبرو مسلسل يحمم القلب.من شيرة على خاطر يبين اللي و للاسف الشديد ما عنا حتى ذات بشرية تنجم تكتب سيناريو لعمل درامي بخلاف سي علي اللواتي اللي اذا كان ننحيو مسلسلاتو الدراما التونسية تقيد فلسة و تخرج بيدها على راسها.ومن شيرة اخرى على خاطر المسلسل هاذا يذكرني في الحالة المكربة اللي ولات عليها المدينة العربي.المدينة ليوم ولات تسخف الحجر.و في عوض السفساري الحرير و الجبة القمرايا و الشاشية القرمز ولينا نراو في دجين طايح وجوب ميني وشلايك بو صبع
انا باش نعمل دقيقة صمت ترحما على روح المدينة اسكنها الله فراديس جنانه و الهم اهلها( اللي هوما احنا اولاد الحومة) جميل الصبر و السلوان

احاسيس خاصة جدا

2007-12-21T09:35:00.000-08:00

ما نخبيش عليكم.كيف نبدى في الشارع نحس حاجات ما نحسهاش في حتى بلاصة اخرى.مثلا نحس اللي انا صاحب الشباب الكل على خاطر ساعات يجيني واحد ما عمري ما ريت خليقتو قبل يقللي:" صاحبي براس امميمتك نلقاشي عندك ميا?" ولا زادة:"صديقي( وساعات عشيري) عندك شعول?" فما زادة نسا كبار كيف يراوني قاعد في الترينو ولا في الكار نبربشلهم عاطفة الامومة الفياضة اللي عندهم و يوليو يحبوني و يموتو عليا و يحطولي هاك الديسكو المجروح متاع:" يعيش وليدي خليني نقعد. امميمتك ظهري عامل فيا."تفضل يا حاجة .سم الله على ظهرك الغالي.و على ذكر الكار و الترينو فما زادة احاسيس خاصة بيهم( بخلاف التقزز من ريحة العرق و الصبابط).مثلا كيف نبدى قاعد و يبدى فما مرا كبيرة واقفة ما تتصوروش قداش بلادنا تولي مزيانة.مشاهد طبيعية تهز العقل و خضار في كل بلاصة و انا نغزر م الشباك و نميل في راسي و عامل مولا الدار موش هوني.زعمة علاش?ا

سنين دايمة

2007-12-19T06:10:00.000-08:00

قتلتو العلوش ?قشرتوه? دمقتو المشوي? ايا صحيتو صحيتو .هكاكة نحبكم .ديما لولانين في التمخميخ.انا زادة ضربت المشوي لين قلت يزي

انا بصراحة العيد الكبير نشيخ عليه و ما نهز راسي م الشواية كان ما تلعب عليا الدوخة و نولي نرا ف الدنيا بالمقلوب.اما السنا الدار طيروهالي و شوية لا هزيت روحي و خليتهالهم واسعة و عريضة.قاللك يا سيدي الوالد كي جا يكسر في العلوش (على خاطر احنا نكسرو العلوش في الدار موش كيما برشة عباد يهزوه للززار يروحلهم في ساشيات).المهم.موش هاذا حديثنا.اي عاد قلتلكم الشايب كي جا يكسر في العلوش قص كتف و حطو على جنب و قال لامي:" يا مرا الكتف هاذاكا صدقة لوجه الله".ياخي انا تنطرت من بلاصتي من غير ما نشعر وقتلو:" علاش? ماو لاباس?".وتكلمت امي من غادي:" وه يا وليدي سنة سيدنا صلى الله عليه و سلم ".وبرا سنة.ما لقيتو كان الكتف تعطيوه هكاكة هناني بناني ?توة يا رسول الله فما واحد بعقلو لا طاح لا دزوه يمشي يعطي الكتف متاعو? تي احنا باكتافنا و شوف و شوف نسلكوها.خلي كي نزيدو نعطيوهم للبراينية.في وقتنا هاذا و احد ما يقضي قضية ولا يطلع ورقة كان باكتافو و يزيد يكمل اكتاف الجيران كان لزم.اما الله غالب.امي و بابا مازالو معدلين على عقلية عام ككح.و موش حابين يفهمو اللي الدنيا تبدلت و الوقت صعب و اللي الاكتاف توة هي راس مال الواحد و بلاش بيها يقعد حياتو كاملة تحت الساقين.اما هات شكون يفهم.تي ربي يهدي و اكهو هاذاكا الواحد اش عندو ما يقول

نشا الله كل شي بالبركة

2007-12-17T11:45:00.000-08:00

ايا قلنا السلام عليكم

عندي مدة على تدوينة.و اللاهي, ما عنكم علاش تحلفوني, التدوين خلى عليا بلاصة و ربي تستر لا يوليلي محنة و نوللي مثلا نحشش على تدوينة.حاسيلو. الحي روح كيما يقولو و بقدرة ربي باش نرجع نصول و نجول بتمخويري.

مخ الهدرة: تدوينة ليوم حبيت نهني فيها جنينة البلفيدير اللي انزادلها 4 اشبال (قولو تبارك الله) في المدة اللي تعدات.اي نعم .4 ضربة وحدة.معناها عمك الصيد طلع عندو ما يقول في روحو.خمسة و خميس ع الكفاءات التونسية.هاي الرجال( نقصد الصيودة) ولا لوح.و نزيدكم زيادة السيد راهو كان معمل على اكثر.اما اهوكة ماخذة خاطر في جماعة التنظيم العايلي.مشقيين رواحهم و باعثينلو مرشدة اجتماعية حتى للقفص.اي عاد قال ما يجيش منو نلويو العصا في يديهم

يا سيدي يترباو في عزكم (ولا هو في قفصكم )ونشا الله يطلعو م الذرية الصالحة.و بقدرة ربي دوب ما نتفاضا نجي نعمل طلة.مني نهني و مني ناخذ بايي في الزرير

كاستينق

2007-12-07T09:12:00.000-08:00

قناة التمخوير كي العادة تمتعكم بالجديد.و الجديد هو انطلاق الموسم الاول ل" تمخوير اكاديمي".و باش نشرف شخصيا ع الكاستينق اللي باش يتم في نزل العياشي بالعاصمة.فعلى كل من يرغب في المشاركة الالتحاق بالنزل المذكور مصحوبا بصورة شمسية حديثة العهد شريطة ان تتوفر فيه المواصفات التالية

مزيان و يهبل و يقتل و يفتق...

يعرف يشطح مليح على طار بوفلس

فريفطة و عندو ما يكفي من الميوعة و الركاكة باش يعجب شباب توة

مع العلم و انو المؤهلات الصوتية و الفنية لا تؤخذ بعين الاعتبار.المهم يكون قادر باش يتمسكن ويقول: امان بجاه ربي صوتولي.واحنا نوعدوه باش على قد ما يصوتولو على قد ما نصوتوه و نعملو فيه شر الشعف.باش نعملولو كعيبات ماش في شعرو.و كان لزم نعلقولو بلوطة ولا حتى زويز و نطيحولو سروالو وقدرو (هاذا اذا كان عندو قدر).و باش نعملوه كاراكوز ونفرجو فيه اللي يسوى و اللي ما يسواش.وباش نعديوه نهار كامل حتى لين لعباد يفدو من خليقتو .باش نعديوه وهو راقد .و نعديوه وهو يتكومك.و نعديوه وهو يمخور في خشمو و ي... (خلي عزاها سكات

قناة التمخوير ديما في الموعد( كي التوانسة الكل دايور

ايام دريس المسرحية

2007-12-06T10:11:00.000-08:00

تدوينة ليوم ثقافية بحتة(والثقافة هنا بالمعنى الاصلي موش بالمعنى اللي ينجم يمشي في بال البعض منكم).وبما اني من متتبعي الحركة الثقافية في بلادنا ما حبيتش نخلي الفرصة تتعدى من غير ما نحكي ع الحدث اللي تشهدو الساحة الثقافية ها الايامات و اللي هو ايام قرطاج المسرحية(او بالاحرى ايام محمد دريس المسرحية)اللي حبيت بها المناسبة السعيدة نشكرو ع البرمجة متاع السنا اللي نتصورها ترضي الناس الكل بما فيهم النبارة اللي ديما موش عاجبهم شي كيفي.و الشي هذا في الحقيقة موش غريب على ادارة ها المهرجان و على راسها سي محمد دريس بما انو مبمبر على عرش المهرجان و المسرح الوطني توة سنايات الله.وحبيت زادة نشكرو على خاطرو تبارك الله عليه حاذق و يخاف على فلوس الدولة.لكن يا رسول الله باش مهرجان اد الدنيا و فلوس كي التراب تعطي فيها وزارة الثقافة يرحم والديها, هاذا الكل و ما تنجموش تلمو تفتوفة تعملولنا بيها وريقة فيها البرنامج? لازم واحد ما يتفرج في عرض كان ما ساقيه تتقطع و ريقو يشيح و يبدى يدور كي رقاص المنقالة ما بين المونديال والتياترو و المسرح البلدي? ياسيدي موش لازم بالكولور حتى حتى جرد شوليقة نواريبلون

اوسي روايال كو سيقولان

2007-11-30T14:06:00.000-08:00

كلات بعضها في فرانسا على حكاية الزوز مغاربة اللي قتلوهم البوليسية و برا عاد توة اش باش يفكها.وموسيو ساركوززي يضهرلي فيه موش ناوي يجيبها لبر.توة كي كان جرد وزير داخلية و قال على الزمقري" راكاي" قلنا مازال صغير و ابريتو نقعدو وخيان و ما صار باس.ولو انو الزمقري وقتها ما قصروش و شوية لا قلبولو الدنيا سافيها على عاليها.اما توة الشي ولا عيني عينك.لا حشمة لا جعرة.قالك باش نتبعو المجرمين قضائيا.لا ما حقوش.اش كان عليه كان حرقولكم كريهبة ولا ثنين.تستاهلو.ماولاباس كلاب العسة متاعكم يقتلولنا في المنحرفين متاعنا.احنا ما نحبوش في منحرفينا راهو.ايا تره.وعلى كل حال سي ساركوزي موش شاد علينا السما لا تطيح.لا هو و لا فرانسا متاعو

و اخيرا حبيت نقول كليمة للوخيان الفرانسيس: بجاه ربي اش معجبكم فيه الفرادي هاذا? داكوردو خليقة و راس كيف الناس. اما بصراحة السماح. ما هضمتوش. م ارزن ملايكة جد بوه.اشبيها مادام سيقولان? الساعة حليلتها و عيني ما تضرها عندها فيانة متاع بلدية من قاع الخابية.تي ربي يهدي و اكهو.هاذاكا واحد اش عندو ما يقول

بعثان المؤسسات اللي يساهم في تدوير عجلة الاقتصاد

2007-11-21T09:22:00.000-08:00

م اللي كنت صغير نسمع في اخبار الثمنية يقولو: الدولة تشجع على بعث المشاريع و المؤسسات.اما التجاوب معا ها التشجيع ما يكونش ديما في المستوى المطلوب سيرتو في البلدان اللي يقولو عليها م العالم الثالث كيف بلادنا

فما اللي ياخذ بخاطر الدولة و يبعث المؤسسات و المشاريع و بالتالي هي زادة تبعثو طول و عرض و ترصيلو لا يخدم لا يقدم و يعدي حياتو بطال

وفما اللي ريوسهم صحيحة و ما يسمعوش كلام الدولة و ما يبعثوش المؤسسات و المشاريع.بل بالعكس.يبعثولها.يبعثولها مطالب شغل طويلة و عريضة و يبداو يبندرو ويعاودو.و النتيجة كيفما تعرفو الناس الكل المؤسسات و المشاريع تبعثهم طول و عرض هوما ومطالبهم و يعديوحياتهم بطالة

خلاصة القول: تبعثو ولا ما تبعثوش المؤسسات و المشاريع تبعثكم تشيتو

مسكينة

2007-11-18T07:57:00.000-08:00

مسكينة امبوبة البلدية .ومسكين انا اللي كل ما نروح عقاب الليل نبدى نطفز و ندحس و هاني زدمت في بوتو هاني تدعثرت في حفرة على خاطر الامبوبة المحنونة ديما مكسرة.انا الحقيقة غايضني حالها كيف ما غايضني حالي على خاطرها هي زادة الناس الكل عندها بيها بونتو.م الفروخ اللي ما يعرفو يقمرو بالتريبولات و الحجر كان فيها.لخدامة البلدية اللي بالطبيعة ما عندهمش وقت باش يصلحوها على خاطرهم لاهين في التكركير و ضربان النوم.لبياعة الشراب مرشي نوار اللي ما ينجمو يقومو بالواجب المقدس متاعهم في افساد الشبيبة (كي اللي هي موش ناقصة) كان في جو رومنسي باش البوليسية ما يفطنوش بيهم و ترصيلهم في حل و اربط والشبيبة مسكينة تقعد طايحة مونك
ساعات كي نقعد بيني و بين روحي نقول علاش في عوض الحومة العربي ما جيتش نسكن في المنزه ولا في المنار? و من بعد يرجعلي شاهد العقل و نقول: اللي برجو بالمرمة يموت في سطل البغلي

خبر عاجل

2007-11-18T07:19:00.000-08:00

خبر ليوم لايزي عاجل و لايزي ما يفرحش بالكل.الى كليوناتي اصدقاء المدونة نقوللهم يضهرلي باش ترصيلكم تلوجو على مدون اخر تقراولو على خاطرمدونتي كاينني فيها على ابواب فلسة و ربي تستر لا نولي ننش في الذبان و نقول باع و روح
الحكاية و ما فيها الشايب( او الوالد او بابا )رقد و قام طلعلي بطلعة ما كانتليش على بال.قاللك هاذا ربي و انا تحتو كان ها الانترنات مازالت تزيد في داري دقيقة.ويا انا ياهي.ياولدي في طولك.يا ولدي في عرضك.شي.النافع الله
موش لازم نقوللكم قداش فرحت.حاسيلو م الفرحة ضربت ابي( بالشدة فوق البا) جننته (بالفتحة فوق التا )(هاذا راهو جوست مثل شعبي تمشيشي في بالكم الحكاية بالمنجد)
وبناءا على ما تم ذكره سلفا باش نوللي نكتبلكم من هاك البيوت الملعونة اللي يقولولها بوبلينات

اهوكة حتى انا ما ننجمش نصبر عليكم كيفما انتوما ما تنجموش تصبرو علي

حتى احنا عنا ما نقولو في رواحنا

2007-11-07T03:49:00.000-08:00

بش نحكيلكم ليوم على ارتيكل قريتو في مجلة اجنبية (لا فايدة في ذكر اسمها باش ما نعملوش اشهار مجاني ع المدونة).الارتيكل هاذا فيه كمشة ارقام قياسية متاع الرياضيين الدمادم في العالم.الارتيكل هاذا يوري بالمكشوف (وبسويعة سبور) اللي اولاد العكري مساكن اولاد باب الله و على نيتهم ولا نفعتهم لا تكنولوجيا و لا عمار بالزور على خاطرهم راقدين على وذنيهم وما يعرفوش اش قاعد يصير من ورا ضهوراتهم و ارقامهم القياسية طلعت فالصو و ما ينجموش ينافسونا فيها على خاطر بكل بساطة احنا خشان عليهم.وسيرتو في ميدان الرياضة.وهاو باش نعطيكم امثلة تاكد كلامي

بطل العالم7 ولا8مرات في الفورمول 1 مايكل شوماخر كان يجري معا سواق اللواجات متاعنا اللا ما يجي الاخر

اشكون يشوط اقوى زعمة ?التونسي ولا روبيرتو كارلوس متاع البرازيل? تره

اما اللي قالتلهم اسكتو هي حكاية ستاد الماراكانا عندو اكبر طاقة استيعاب في العالم.دوييييو.عندكم الحق ماتعرفوش الميترو نومرو2

برجولية القورة طلعو حكايتهم عورة و ما عندهم في السوق ما يذوقو.و لذا انا نطالب من موقعي كمدون تونسي مخوار باش نقاطعوهم و ما عادش نصدرولهم حتى كعبة حلوى وما عادش يراو من عنا مليم احمر باش يترباو و المرة الجاية يعملولنا قيمة و قدر و يعملو ليستا متاع ارقام قياسية جدية تاخذ بعين الاعتبار الكفاءات متاعنا على خاطرنا ماناش تشيشة ولا طريف

حتى السما يحبو يشاركونا فيها

2007-11-03T06:35:00.000-07:00

ما نعرفش كان سمعتوشي بمشروع سما دبي في منطقة البحيرة.(هي بالعربي يقولولها الللاك اما مافيها باس ناخذو بخاطر جماعة لوغة الضاد).قالك يا سيدي (هاذا اذا كان معلوماتي صحيحة) اللاك باش يولي جنة على وجه لرض.عمارات و ابراج وهيلمانات.حاسيلو حاجة من ورا العقل.الشي هاذا ولو انو يفرح برشة دعاة التقدم و الازدهار و الكلام الفارغ.فانو انا واحد من ناس ينفخلي راسي (بش ما نقولش حاجة اخرى) على خاطر ابو كشطة الخليجي كان يلقى ياكل الدنيا و يتسحر بالاخرة.و موش ناوي يشد قدرو و بالتالي لازمو واحد ولد امو يفهمو قدرو.كي السما متاعو ما كفاتوش.ما عجبتو كان سمانا احنا ? ايا فك على سمانا وبرا العب بعيد لا ننحيولك سماك.كناشي رايضين على رواحنا? هبط علينا ابو كشطة كي القضا المستعجل.

سم الله العضيم الرحمان الرحيم

ابهم جمهور في العالم

2007-10-26T13:11:00.000-07:00

ما يخفاكمش بالطبيعة اللي بعد كل ماتش كورة يتلعب في ستاد المنزه الميتروات و الكيران الريحة متاعهم تتقطع.الشي هاذا يعني اولا و بالاساس كونوا فما برشا ناس( ومنهم العبدو لله) لاعندهم لا ناقة و لاجمل في ماتش الكورة باش تمشي فيهم و في الحشاشي و ترصيلهم ضاربينها على ساقيهم م المنزه حتى للباساج باش يلقاو ترونسبور.اش باش نعملو كي عنا جمهور ما يعرف كان الهمجية و التكسير.كاينو عندو بونتو بالكيران و الميتروات.جمهور الكورة بخلاف كونو جرايرو حرفة عندو صيفة بهامة و تصطيكة بقري ما راتهمش عيني.وهاني باش نقوللكم علاش
توا متفاهمين فما عداوة تقليدية مابينات جمهور الترجي و الافريقي و الحكاية هاذي موجودة في العالم الكل. اما علاش كل واحد يقول لاخر جبري وانا ولد العاصمة? زعما هاذا الكل العاصمة متاعنا طيارة ?اشبيني ما في باليش? وزيد فوق هاذا الكل الناس الكل ماذابيها تخربقها:في هانا زدمنا.في نحتلو القنطاوي.في نهدوا الدنيا.و بالطبيعة ما ننساوش العبارة الشهيرة:" نديرو القيرة". انا قيرة متاع دين امكم ? منين هبطت عليكم ها الوطنية الكل? اهيكة فلسطين و العراق امشيو ديرو فيهم القيرة ولا ديرو اللي يضهرلكم.المهم اخطاولنا الميتروات و الكيران خلينا نروحو على رواحنا و مبعد اشطحو فيها كيما تحبو

اخبار الرياضة قلبت الدنيا

2007-10-26T12:50:00.000-07:00

يضهرلي اللي فما شكون خذا في خاطرو م التدوينة لخرانية (متاع اخبار الرياضة) و قالك هاذي انترنات و ناس مخلطة ما يجيش منو نقولو كلام عيب.لامحالة يعطيهم الصحة على خاطر يحسو على الذوق العام متاع المدونة.اما الله غالب.هاذاكا حد الجهيد.انا حاولت باش نلطف عباراتي على قد ما ننجم اما زادة ما فيها باس كان نفوحو المدونة مرة في القداش باش ما نقعدوش في كل مرة نعاودو ونكرطو في نفس المعبوكة

اخبار الرياضة

2007-10-20T11:38:00.000-07:00

مشاهدينا الاعزاء اسعد الله اوقاتكم و من قناة التمخوير نحيكم و نقدم لكم النشرة الرياضية

شهدت مساء اليوم اول سامدي سوار بعد العيد كل من كارفور و مونوبري و محلات المرشي نوار انطلاق البطولة الوطنية للبلعة.وقد جمع لقاء القمة بالملعب الاولمبي بكارفور بين البوخة والكوديا وقد انتهى بنتيجة التعادل السلبي0مقابل 0.وقد شهدت الجولة الاولى للبطولة اقبالا جماهيريا كبيرا حيث استنزفت حشود الزبراطة الكميات المعروضة في وقت قياسي مما يبشر بموسم ناجح على جميع المستويات خاصة بعد الركون للراحة طوال الشهر الفضيل.و على ضوء النتائج المسجلة اليوم يكون ترتيب فرق القسم الاول كالاتي: في المرتبة الاولى البيرة بعد الانتصاربرباعية نضيفة على المرناق تليه البوخة في المركز الثاني فيما يقبع الطاردي في مؤخرة الترتيب بعد تتالي نتائجه السلبية و ازمة العنب التي تشهدها الاوساط الرياضية.وقد وجه مدير الشركة( نقصد رئيس الجمعية) نداء لاحباء الجمعية الغيورين للالتفاف حول الجمعية و انتشالها من الوضع الحالي الذي يهدد بسقوطها الى القسم الشرفي

الى هنا ناتي الى نهاية اخبارنا الرياضية.الى اللقاء

شهر من التمخوير

2007-10-19T12:29:00.000-07:00

اي نعم.اللي قراتو عينيكم موش غالط.عندي توة شهر كامل م اللي بديت نمخور.ونهز و نصبت.و انتوما تقراو و تميلو في ريوسكم.في هاذي ما عجبتنيش.في هاذيكا جاتني ع الضلعة العوجة.في لخرى اندراكيفاش.حاسيلو تمخوير في تمخوير.بيني و بينكم الحكاية عاجبتني و مانيش ناوي نبطلها على خاطر اولا العوج اللي نرا فيه لايزي ما يوفاش و زيد ينطق م الاجناب. وثانيا على خاطر قاعد من تمخويرة لتمخويرة نكتشف في مواهب تمخويرية ما كنتش نعرفها عندي.ومادامنا في جو احتفالي و الربوخ سيد الموقف حبيت نشكرالقايمين( و الراقدين )ع الانترنات اللي اتاحولي الفرصة بش نسب و نلعن و ندخل بركبة في اللي يعمل هكة ولا هكة و يسيب البهامة متاعو

ايا صفقوا خ نقصو القاطو و نفرقو القازوز

خبر عاجل

2007-10-18T04:20:00.000-07:00

عندي ليكم خبيرفرشك من هاك البوند الحمرا اللي يحطوها جماعة قناة تونس 7 و يكتبوفيها كمشة اخبر بايتة الاكيد كونها سبق و كسرتلكم كرايمكم كيفي.ماعليناش

قاللك يا سيدي يا بن سيدي( و الكلام على لسان قناة تونس 7):في مكالمة هاتفية جرت بينهما القائد معمر القذافي يعرب باسمه و باسم كافة الشعب الليبي عن اسفه و تضامنه مع الشعب التونسي بعد ما ادت اليه الامطار الغزيرة الاخيرة من خسائر مادية و بشرية. هاي المخوية ولا بلاش.اش قالك اش قال عليك سي المعمر غايضو حالنا و حممنالو قلبو.ياخو بخاطرك يا عميرات و يسال عليك الخير و الله لايوريك باس.هو كي تجي تشوف القذافي المرة هاذي دز فازتو.اما من دون خلق ربي الكل ما تحير علينا كان رئيس ليبيا? يا رسول الله

طز في...( زعمة شكون ?تره

عيادي وسنين دايمة

2007-10-13T08:48:00.000-07:00

ايا نشا الله عيدكم مبروك يا جماعة.و انشا الله كل عام و انتوما حيين بخير.هو لا محالة جات امخر شوية.اما الله غالب.ماكم تعرفو الواحد كي يغطس في البقلاوة و كعك الورقة ماعادش يتلفت لا لمدونة ولا سيدي زكري.حتى هو رمضان السنا عمل فينا (اللي صايمين بالطبيعة )وما تعدى كان بسيدي و سيدك.تي اكهو.الدايم ربي.اهوكا الغشيشرات شاخو وكسرولنا ريوسنا كي العادة بالفوشيك وكملو ضربو على قلوبهم المهبة.هاذاكا اللي بيه الفايدة.اما الباقي الكلو يقعد حديث

تعويضات مالية

2007-10-08T11:06:00.000-07:00

و انا ندولش ع الانترنات, طحت بالصدفة على ارتيكل عنوانو: محام تونسي يقاضي قناة حنبعل بسبب كلمة"بطيحة" في مسلسل الكيوسك.قالك الكلمة هاذي عند السواحلية عيب.و معناها شاذ.بالعربي يرحم عمي. بيني و بينكم كيف قريت العنوان و بديت نقرى في المحتوى فرحت و قلت مازال الخير في الدنيا.ع الاقل فما شكون يغير على لوغة بلادو و يحس ع الاخلاق الحميدة(اللي في الحقيقة عندي مدة نسمع بيها و لتوة لا ريتها) حتى لين وصلت للجملة هاذي:" وقد طالب المحامي بتعويضات مالية له و لابنائه بسبب الضرر الحاصل بسبب العبارة".و وقتها طلعت الداقزة متاع ها المحامي المغيار.السيد طلع حاشتو بالحنينات.و لا يهموا في اخلاق حميدة و لا اخلاق علجية.اهوكة لقاها فرصة قالك نعملو قضية ننطروشي منها حويجة.ياخي لها الدرجة القضاة متاعنا دراوش? ولا سي وخينا مخو على قدو? اما زايد.اذا لم تستح فافعل ما شئت

قسمة وخيان

2007-10-05T08:12:00.000-07:00

اليوم باش نحكيو شوية فلسفة.ولو اني نعرف اللي فمة برشة ناس يتنقرصو م الفلسفة.اما المدونة مدونتي و انا اللي نحكم.و اللي موش عاجبو حد ما ضربو على يدو و قاللو اقرى بالسيف.وكيف ما يقولو: اللي شاهي شهوة يديرها في عشاه.و انا باش نديرها في مدونتي

ما نطولش عليكم و باش ندخل في الموضوع ديراكت.الاكيد كونكم سمعتو بالاشتراكية.و الاشتراكية هاذي باش تبدى الامور واضحة معناها كونو الناس الكل متشاركة في كل شي.بالفلاقي يعني كل شي متاع الناس الكل باش هكاكة نقضيو على حاجة اسمها واحد طنطخة و واحد زوالي بما انو في الحالة هاذي حق الملكية ياكل كبوط

و يقولو جماعة الاشتراكية و على راسهم الفيلسوف الالماني كارل ماركس (السيد اللي في التصويرة) كونو بالطريقة هاذي نضمنو تقسيم عادل للثروات و الفليسات ع الناس الكل.كاينو موش عاجبو التقسيم اللي عاملو ربي.ياخي هو يعرف يقسم خير منو?.باهي يا سي ماركس خوذني على قد عقلي.واللي حياتو كاملة يكلت و يسلت و ريقو شايح باش يخلط على زوز فرنك و اللي نهار كامل مبنك في القهوة كابوسان تمشي و كابوسان تجي يقسمو زادة? انا و اللاهي ماذا بيا يقوملي سي ماركس من قبرو يجاوبني و من بعد يرجع يموت على روحو على خاطر ها القسمة العادلة اللي يحكي عليها ما حبتش تدخل لمخي

انا اونتوكا مانيش مستعد نقسم معا حتى حد.ولو اني ما عندي ما يتقسم.خوكم فرايجي في النازلة.وحتى جرد الاورديناتور شاريه الوالد.اهوكة كان حاشتكم بحاجة شوفو معاه بالكشي على حسب التقسيم العادل متاع ماركس تخلطوشي على لقشة م السوري ولا على فلسة م الكلافيي.شكون يعرف

وحدك يا جيمي

2007-10-03T09:14:00.000-07:00

ليوم ما عنديش شاهية متاع كتيبة.اما هاو بش نكتبلكم كليمتين شدو بيهم قلوبكم حتى لين يعمل ربي دليل .نعرفكم ما تنجموش تصبرو عليا.هو في الحقيقة بيت شعر.يزيني م السبان و انا نهار كامل نشكي و نبكي و ما عاجبني شي.قالك يا سيدي

انا قاضي العشق و العشق قاتلي

وقاضي قضاة العشق قاتله الهوى

ايا انستو

اولنا صغار و عقابنا دراوش

2007-10-01T07:57:00.000-07:00

يجيشي لبالكم اللي ليوم 1اكتوبر اليوم العالمي للمسنين.العزايز معناها.مازال كان باش نعملو عيد للفجل و عيد للخرشف و عيد للمعدنوس.حاسيلو ما ازعمنا في دزان البيدق.توة متفاهمين شيابنا و على ريوسنا و عينينا.اما علاش ها الخماضة الكل? على خاطر جماعة البريمة فيهم يلعب ع البلاس نقيموا الدنيا ونقعدوهها و نعملوه عيد بالسيف? اما هكاكة احنا. الرطابة و قلة ليدام.و حتى كان ربحنا في جرتهم نهير كونجي ولا حتى نصيف نهار.اشبيه في الحكاية هاذي موش عيد ?جات عند المسنين و وقفت ?حتى هاذا كلام
على كل حال انا عندي كليمة رميتها بش ما تقعدش في قلبي و اكهو. اما ما عندي شي ضد عزايزنا الاعزاء.يا سيدي نشا الله كل عام و انتوما حيين بخير.وربي يشدلنا فيكم بش نلقاو لشكون نخليو بلايصنا في الكيران

الاعلان العالمي لحقوق التونسي

2007-09-27T12:54:00.000-07:00

اولا:من حق كل تونسي باش يتدز و يتعفس وياكل طريحة كان لزم, في جميع وسائل النقل العمومية

ثانيا: من حق كل تونسي باش يعدي ال برمي 8مرات ما دامو ما عطاش الجعالة

ثالثا :من حق كل تونسي باش ياكل العصا من عند اي بوليس قبل ما يدخل للستاد بش يتفرج في ماتش كورة

رابعا: من حق كل تونسي باش يرى بعينيه و يموت بقلبو

خامسا: من حق كل تونسي باش يتسرق في اي مكان و في النهار و القايلة من طرف اي نشال يخدم على روحو بضمير

سادسا: من حق كل تونسي باش يخلص الزبلة و الخروبة حتى كان لمبوبة اللي قدام دارو مكسرة على طول العام و كميونة البلدية تجي مرة في الشهر

سابعا: من حق كل تونسي باش يقطع و يريش اللي يحب و كيما يحب و وقت ما يحب مادامو قاعد يحكي في قفاه اما في وجهو ممنوع

ثامنا: من حق كل تونسي باش يفطر في رمضان و يتكيف في الشارع و يبدى يتقزدر كايني جاب الصيد من وذنو

تاسعا: من حق كل تونسي باش يصب بزميلو في الخدمة و ذلك حسب التقاليد العريقة المعمول بيها لدى الصبابة

عاشرا: من حق كل تونسي باش يكركرفي الخدمة و يروح قبل الوقت حسب ما تضمنه قواعد الفصعة

كل اخلال بهذه الحقوق يترتب عليه الخضوع الفوري للعقوبات المنصوص عليها بالقانون

فن التقطيع و الترييش

2007-09-27T11:32:00.000-07:00

فطنت موءخرا اللي و للاسف الشديد تلعط ما نشم شي م اللوغة الدارجة متاعنا.و اللي لازمني نعمل سوايع اوتيت(ولا اوتيد) عند استاذة في التقطيع و الترييش فماش ما نتعلم شمعناها' لوزتها' و' كنتها' و'سلفتها' و' حماتها' و غيرهم.موش خيرلي م اللي قاعد هكة لا نبل لا نعل? ع الاقل خير م الفرانسيس الباسلين 'اونكل' و'طونت' و هز يدك م ا لطبق لا تتحرق

وخياننا الطلاين

2007-09-27T06:03:00.000-07:00

يزيتوشي توة م الركاكة و انتوما تتعززو علينا تقولش عليكم شادين علينا السما لا تطيح.كادوكم كمشة بطالة بش تعطيوهم الفيزا?ياخي عندكم الجنة و انا ما في باليش? حتى السباقيتي و البيتزا اللي تفيسوا علينا بيهم عنا منهم.وعلى شكون ترضى زادة.اما الله غالب.احنا شبابنا يموت ع البراني و عينيه تعشق الدعماش.ولا اش لزو يتطمبش فيكم و يلوح روحو ف البحر على خاطركم قال شنوة"حارق" للطليان و يحب يبني مستقبلو. كايني ما عناش ياجور في البلاد.يا وخياننا الطلاين.جيناكم بجناب الله.اش كان عليه كان عطيتوهم الكوازي متاعهم خلي يقلبو علينا مناضرهم الحرفة. ريح السد يدي ما يرد

عوج

2007-09-27T05:42:00.000-07:00

فديت م العوج.ف الدار عوج.في الشارع عوج.ف القراية عوج.يا عباد ربي راكم روبتولي دمي و قهرتوني بالعوج متاعكم اللي قريب يخرجني من سينتي.ياخي مفطومين ع العوج ولا شنية? ما عندكمش كيف كي ما تطيروليش كيفي? توة كان موش قدر فيكم تو نهج و نخليهالكم واسعة و عريضة.اما اش بش نعمل. يجيشي واحد ينحي خشمو من وجهو? اما حتى نتوما زادة عورتولها راهو و كثرتو على ما وصاوكم.و احوالكم لتالي ليس لقدام.و عوجكم ماشي و يزيد على قدام.حرت و حار دليلي اش بش نعمل معاكم و معا عوجكم اللي ما نجمتوش و طلع اقوى من طاسة مخي.يرحمك يا ام كلثوم كي قلت: للصبر حدود

كانت تشخر زادت بن لادن

2007-09-27T04:51:00.000-07:00

و اللاهي نشهدلك يا بن لادن يا مهف.فرقعتها الدنيا الكل و جبدت روحك و عملت مولا الدار موش هوني.و اهوكة توة قاعد توسع في بالك و تلعب في كاش كاش معا الاماريكان .و ساعة ساعة كي تقلق و يضربك الكبي تبعثلنا كاسات ولا زوز نفرهدو بيهم على رواحنا.اما اللي مغلب عليا و مطلعلي الدم ل راسي هو كونو سيادتك عامل فيها بطل و في بالك زعما هزيتلنا ريوسنا قدام التوريست.ما تخافش يا سي البطل المغوار.ريوسنا اللوطة بيك ولا بلاش.ومادام فما عباد كيفك في الدنيا وراس امك لا تتهز كي تبوس عينك.اما الله غالب.العزوزة هازها الواد وهي تقول العام صابة. تي احنا بالقدر معا وخياننا الاماريكان وحالتنا تكرب. خلي كي فسدتها معاهم.باللاهي قلي كي نستحقو فلوس(و احنا ديما مستحقين)اشكون بش يسلفنا تره?ايا ضم فمك خلينا نعانيو ما كتب بالساكتة

الاثنين الرياضي

2007-09-25T21:35:00.000-07:00

الاحد الرياضي يتعدى في سيدي رمضان في" سهرة الاحد" كيما يقولو جماعة التلفزة. معا نص الليل و اربعة .اما يضهرلي فيهم نساو اللي كي نفوتو نص الليل يولي في صباح الاثنين.توة يا رسول الله ناس تقرى و ناس تخدم و ناس يعلم ربي بحالها تحطولهم الاحد الرياضي في عقاب الليل.اشكون باش يتفرج فيه? اشنوة ذنبي انا كي نحب نتفرج في شوية كورة ?هو لاماحالا كورتنا ما فيها ما يتفرج بخلاف العرك معا الاربيتر و الدبابز و الحجر متاع الجماهير" الغفيرة".اما الله غالب.رضينا بالهم و الهم ما رضا بينا.برجولية ياسي رازي' شوفلي حل 'على خاطرما عينيش بش ترصيلي كل نهار اثنين فاصع م القراية على خاطر الاثنين الرياضي متاعك

اقوى نومرو في العالم

2007-09-22T06:11:00.000-07:00

يقولو:" ان سالتم الله فاسالوه البخت". وانا فرتونتي جات بنومرو47 .ها النويمر التحفون ينجم يكون نومرو الملاين اللي عندك في البانكة ولا نومرو الكراهب متاعك.اما بالنسبة ليا انا نومرو47 هو نومرو افة صفرا تمشي على اربعة عجالي.الحكاية تبدى م المحطة.في غرغور القايلة ولا في شتا تجبد خيطين من سما ما تجيك الكار المحنونة كان ما يركبك السكر و الدم و النقرص و البلاوات السبعة.ما كانش ما عندهاش كيف.و وقتها يبدى الضرب الصحيح.دزان و تعفيس و عروقات و ريحة صبابط.حاسيلو كوكتال متاع روايح يركب ستة و ستين كيف.و بعد ما تتخض مليح و تاكل ما كتبلك من مرافق و شلابق.يسمحولك المسافرين الكرام (بعد مفاوضات طويلة) بش تهبط.و تلقى روحك من "غير ما تشعر ماكل طريحة نباش القبور.توة فهمت علاش المثل يقول:" قوايل و تبديل كيران

القسم عل الله م ال47

لكلنا مرضى بالقلب

2007-09-22T05:30:00.000-07:00

التونسي و المحبة كي ل فار و القطوس.هاذي حاجة اسمها حب قالك الف و اععوذو بالله كان دخلت مخاخنا و مشكلتنا معاها مشكلة و حكايتنا معاها خلي و اسكت.هوما في الحقيقة زوز حروف خفاف نضاف.الحا و البا.اما وقت الرسمي يوليو م الوزن الثقيل.و يرزنوا فوق لساناتنا و عروقاتنا تولي شرتلة و ما عادش نعرفو نقولو كلمتين خوات.علاش في الكلام المرزي نتسرحو و تطوال لساناتنا وتولي دايرة برقبتنا?علاش ما نوصلو ننطقو ها الزوز حروف المحنونين كان ما وجوهنا تولي في قفانا? هاذا كان ما وليناش نتمتمو و نتكلموا في حوايجنا و ناكلو ف الحروف.يلزمنا منو هكة نتفقدو قلوبنا ساعة ساعة بالكشي يجي نهار و يهديهم ربي و يوليو يخدمو

نحبكم

الزنس اللطيف

2007-09-20T11:37:00.000-07:00

الزنس اللطيف للاسف ما عادش لطيف.ولى يسمع باللطف سمعان.و احنا اليوم ما نجموا كان نطلبوا اللطف على خاطر الشي ماشي و يزيد على قدام.

الزنس اللطيف ماخذ راحتو و اكثر من راحتو و عامل في خلاها ما والاها.يا دخان.يا كلام م الحزام و رد اللوطة .وهات من اك اللاوي.و لا صحة لا يكثر خيرك.اللي تجي تكلمها تفوح فيك و تجيبهالك سحري وبحري.حرية المراة .التقدم.الديمقراطية.حقوق المراة.كان هاذي هي حقوق المراة بلاش بيها خير.وما نخبيش عليكم.يضهرلي يلزمنا نتحيروا على 'نصف المجتمع ' على خاطر بيني و بينكم شامها قارصة.وكان ما ترصيلنا في حل و اربط ما دام لومور ولات بلمنجد.

حاسيلو نشا الله العاقبة خير

الى سمير الوافي

2007-09-20T08:22:00.000-07:00

فدينا من صراحتك اللي ما تكساب م الصراحة كان الاسم.انت وافي و صراحتك اوفى و اوفى.و بصراحة ماذابينا كان تنفسنا و تسيب عكيك م الريق البارد و تخلي صراحتك عندك على خاطر المشهد الاعلامي موش ناقص ميوعة و قلة حيا بش تكمل انتي تزيد على مرمتوا.صراحتك يا سي سمير ما رينا منها كان النفاق و المساطة .ف من فضلك.تعمل علينا اكبر مزية تخطاك من دور الصحافي اللهلوب اللي يعرف فضايح الفنانين الكل.و تلها في حوايجك

تحياتي و اشواكي

في الدنيا هاذي ما خيرش م الوضوح

2007-09-20T07:59:00.000-07:00

الواضح من 'واضح'متاعك يا سي نصر الدين بن مخ طار هو كونو الكاساتات ماعادش لموضة.و هاذاكا علاش دورتها تدبير راس معا قناة حنبعل فماش ما يدور الزيرو و تتنفنف لومور .اما اللي موش واضح هو منين جبت ها التضومير الكل.نشاالله بها الكليمتين نكونو وضحنالك اللي موش معقول واحد نهار كامل صايم و يعلم بيه كان ربي ما عينوش بالتضومير البايت متاعك

? واضح

التمخوير حق كل مواطن

2007-09-19T11:10:00.000-07:00

ما دامنا في شارع الحرية حبيت نستغل الفرصة(بعد اذنكم بالطبيعة) بش نمخور عليكم شوية في اطار موجة

.التمخوير السايدة في كامل شرايح المجتمع هل ايامات

م الكبير للصغير للي يدبي ع الحصير.لكلنا عنا الحق بش نمخورو كيف ما نحبوا و وقت ما نحبو ما دامنا في بلاد الديمقراطية و حرية التمخوير.احنا كنا ديما سباقين في الهزان و النفضان و التقطيع و التريش و الي عنا ما عند حد و كملوا عملولنا هل الانترنات بش ما نقعدوش نراو فالناس تمخور بعينينا و نموتوا بقلوبنا.و على كل حال يكفينا فخر الي العالم الكل يشهد بينا في ميدان التمخوير.و هذا في حد ذاتو دليل واضح على عمق الموهبة التمخويرية متاعنا