mercredi 20 août 2008

حتى الفايس بوك رزاونا فيه

فوالا.و اللاّهي شمّيتها قارصة م الاوّل.م اللّي دخلو هاك الكعبتين و كعبة اللي جايبين فيها زعمة زعمة خشان ياسر و يفهمولها في السياسة و قال شنوّة باش يجيبو الصيد من وذنو.تي عاد هام الخوانجية طلعو فيهم الهون.ع الاقل داخلين ببّوشتهم و يصنعو في قنيبلات على رويحاتهم لا قلّقونا لا قلّقناهم.تفرهدتو توّا? امشيو شوفو" فوروم" متاع طبخ توّة انشرو فيه" افكاركم التنويرية العضيمة". و قيلونا لله في سبيل الله.انا الحقيقة ما نلومش على عمّار ال404 على خاطر عندو الحق كيف يرى العريبة تهز و تنفض و اللي هاذا يحب يولّي" شيغيفارا" باش يعمل هكة و حتى اكثر."بيان سور". مادام الشعب الكلّو ولّى متخرج من كلية الحقوق و العلوم السياسية متاع القهوة متاع الحومة.و فلان قال و فلانة عملت و لخرين قمبلو على لخرين وهي ماشية هكّاكة...و النتيجة: نمشيو احنا في الساقين.ياخويا اشنوة ذنبي انا و احد من ناس دوبي دوب روحي نمشي الحيط الحيط لا قلّقت حد لا درت بحد لا دقّيت على باب حد?لازم تمرّوهالي الانترنات?ايّا سيدي هاو بطّلناها باش تتفرهدو
ياخويا ماو قالولكم خوذو حرية التعبير. اي عبّرو على رواحكم, فرغو قلوبكم ,فتّقو مواهبكم, اما ياخويا زادة فمّا بلايص خاطينكم ماذابيكم ما تحشيوش خشوماتكم (ولا اي حاجة اخرى) فيهم.ساهلة ياسر.ولاّ الحاجة اللي ما تعرفوهاش هاذيكة اللي تحلى في عينيكم وتولّي فيها العسل?تتبعو في القورّة? القورّة ياخويا فايتينكم بالاف السنين تحضّر و ما وصلو ليوم للي وصلولو كان ما ولاو عندهم عباد تعرف توصّل فكرتها باحترام و بوعي و و و و ...موش بعباد تحكي في التراكن ولّي متخبية ورا كلافيي.قالّو حرية التعبير قالّو ريق بارد.هاني انا مثلا نمارس في حريّة التنبير.و اللاهي لاهي دونيّة بالكل.اهوكة الواحد ينبّر و يموخور و عامل كيف على نفسو.لا تسكّرلي لا نسكّرلك. و ربّي يفتحها في وجوهنا الناس الكل(الاّ هاك الجميعة اللي سكّرولنا الفايس بوك على خطرهم.راهم كلاو على قلبي و شربو.و المجراب تهمزو مرافقو).اهوكة توّة عاد لا فايس بوك لا فايس امّك.شوفو بلاصة اخرى اشطحو فيها

5 commentaires:

Tounsi_Zawéli a dit…

D'habitude je ne dis pas des choses gentilles sur les blogs TN.

ama pour ce post, ya3tk ésa77a. Tres pertrinent ce que tu dis.

L'amateurisme politique du peuple est pire que la tyuranie de son gouvernement.


Zawéli.

hnani a dit…

عندك ألف حق، أشنوا ذنبك انت؟
حقهم يعملوا فايس جد للسياسة و يخليولكم الفايس بوك

weld houma 3arbi a dit…

هناني: يعملو اللي يضهرلهم.المهم يخطاو جد والديّا انا برك
تونسي زوّالي: تي هاك ولّيت تطل.ريت ماو كي تجي للثنية:) ياخويا على كل حال مرحبا بيك و بالزواولة الكل في كل وقت.و مافيها باس كان نتخالفو في الرّاي ساعة ساعة.الشي هاذا يصير راهو حتّى في اكبر الجمعيّات

Anonyme a dit…

walahi 3andik alf 7a9
brabbi we7id mazel far7an b cha5tourtou taya7ha bil facebook yji ya7r9ouh fiha mouch ma39oul :p
rabbi yehdi w barra !!!!

sidijmour a dit…

ياخويا تباركالله عليك. أنا خوك سيدى جمور مازلت جديد على البلوغسفار وثمة برشة حاجات مانعرفهمش من ذلك كيفاش نعمل روابط مع مدونات اخرين وكيفاش يتحل البلوغ متاعي للسيد
إللي عملتلوا كومنتار ياخوياوكيفاش نزيد حسن البلوغ متاعي نورنا ومرحبا بيك في المدونة متاعي وهذا العنوا ليك
ولجميع لوخيان.
sidijmour-tanit.blogspot.com