العمل الطلابي (الكلمة هاذي تعجبني ياسر.تضهرلي متاع هاك الناس اللي يعديوهم في الاخبار ويبداو لابسين كوستوم و كرافات و يتكلمو بالعربية القحة(القحة بالشدة فوق الحا و بلاش با.لا ترصيانا في حل و اربط))تي حاسيلو.موش هاذا موضوعنا.اي عاد قلتلكم العمل الطلابي في تونس قاعد يعرف في تطورات كبيرة ياسر و قاعد يواكب في العصر و يتفاعل معا متطوراتو.و الاكيد كونو الناس اللي تاخو الميترو كل صباح قاعدة تواكب في ها العمل الكبير اللي يقومو بيه الطلاب التوانسة
الطالب التونسي فاق اللي "يا كريم متاع الله" و"حويجة لله يرحم بوك" ما عادش توكل الخبز.و حكاية المرايات الكحل ما عادش لاموضة و الناس الكل فاقت بيها.و بالتالي الوصول الى جيب الزوالي ولا كاسح شوية و يلزمو تكتيك جديد.و الطالب التونسي بالطبيعة لقا الحل: زوز باكوات شوينقوم على زوز باكوات موشوار و يبدى من فاقونة لفاقونة في الميترو يتشهلل ويتضومر و زعمة زعمة يبيع في سلعتو. و في اكثر الحالات الناس يعطيوه الفلوس من غير ما ياخذو شي.و سي وخينا يصور الخير و البركة
الابتكارات اللي كيف هاذي ما تنجم كان تعود بالمنفعة على الطالب التونسي.و يا حبذا لو كان الطلبة متاع الجامعة يقتديو بزملائهم الطلبة متاع الميترو و يبتكرولنا فازات جديدة نحلو بيها مشكلة المصروف.انا واحد من ناس الشايب ما يرميلي هاك الزوز فرنك اول كل شهر كان بسيدي و سيدك
2 commentaires:
L'hyperbole est pas mal ;)
walah yasser tayara ce msg :)! bonne continuation ya weld el7ouma! je connais tu parles de qui! ayamet metet3awedch fi 10decembre w fi 2 ya 7asrea!
Enregistrer un commentaire