samedi 13 septembre 2008

تخنتيبة متاع واحد يحرر في الوقت

اييييييه.يا حسرة كي كنت باش نحرر الوقت في سيدي رمضان ندورها شليلة و مليلة:المدينة و الربطين.و نبدى خوكم نتشهّى و نعاود.ايترة لبن م المرشي سونترال,رطيّل مقروض من باب منارة, كعيبات وذنين القاضي م الحلفاوين ,خبيزتين سخونين من كوشة الصبّاغين ,و من بعد نعمل طلّة ع البطحا نتفرّج في طريّح سخون حتّى لين يقول الله اكبر نروّح خوكم للدّار في يدّي الخيرات السّبعة ديراكت نغطس في صحفة الشربة ما نهز راسي كان ما تولّي تلمع كاينّي مغسولة جديدة.وقتها نتنهنه و نحل فلسة السروال
وينهم هاك الايّامات? رمضان السنا خوكم خرجت نهار للعطار باش نجيب خبزة لعبت عليا الدوخة وكشاكشي خرجت تقولش كنت في الصحرا.يا ممّيمتي ملاّ سخانة ! السماح.اي عاد اش لزّ حمّا يرقص? موش الواحد يركش على رويحتو في الدار خير? من سيت ل سيت و من شان لشان ?هوما يقولو عملوه الحضر و وحلو فيه -حاشاكم- البقر.اما ميسالش .اما خير ولاّ واحد يضرب بقلة ترصّيلو لا يزّي ريقو شايح و زيد مخّو رايب م الفوق? ا ي عاد ليوم قلت اهوكة حاجة و حويجة .نخنتبو شويّة في المدونة منّي نحرّر الوقت و منّي نطيّر منكم وحشة على خاطر عندي مديدة ما كتبتش.تعرفوني ما نصبرش عليكم
مانيش باش نطوّل عليكم على خاطر نعرف اللي في رمضان النّاس الكل خلاقها في وذنها و تستنّا في كلمة الله اكبر بالدقيقة و الدّرج باش تفتّق مواهبها و تمارس الرياضة الشعبية الاولى في تونس:التمخميخ
ايّا هاو يذّن.ايّا توّا مالا نقوللكم شاهية طيبة و اللّي كنت باش نقولو في البوست هاذا تو نقولو مرّة اخرى.ماكم تعرفو.اللاّزم لازم.نخاف لا صحفة الشربة تاخذ في خاطرها

2 commentaires:

Anonyme a dit…

sa77a chribték!! méla romdhan éssné lé lban lé ma9roudh lé wédhnin él 9adhi?? aya 3aad ékbés rou7ék hay jéték ghassélét énnwadér taw nchallah tétfarchék chwaiya !!

مهرة سالم a dit…

مرحبا ...
مدونتك جميله...
بالرغم اني ما فهمتش كل الكلام...
تحياتي لك ولطبق الشوربه..
وألف صحه وهنا