vendredi 19 septembre 2008

كل عام و دولاشتي حيّة بخير


ايّا صحة شريبتكم
ليوم نحتفل بمرور عام على اول تدوينة ليّا في البلوغ.عام كامل و انا نهز و ننفض: نسب هذا,و ننّبر على لاخر, نعفس في هاذيكا, و ندخل ركبة في لخرى. و انتوما تقراو و تميّلو في ريوسكم
توّا عام كامل م اللي حليت ها المحيّل هاذا باش نفرغ فيه قلبي و نوسع فيه بالي من غير ما حد يقلّقني ولا يقعد يغزرلي على جنب تقولش عليه عامل عليّا مزية.والحقيقة العام هاذا تعرفت فيه ع "البلوغوسفير" بكل ما فيها من هزّان و نفضان هي زادة (و يضهرلي الهزان و النفضان حاجة تجري في دمّنا احنا التوانسة.لا محالة هو في كل الحالات يقعد خير من هزّأن حاجات اخرى لاقدّر الله).اي عاد قلتلكم في العام هاذا تعرّفت فيه ع "البلوغوسفير" و على برشة مدونين ناس ملاح و بااااااااارشة موش ناس ملاح , كتبت فيه 70 بوسط ,و زاروني فيه 4071 رقبة (قولو تبارك الله) م العالم اجمع (حتى من اسرائيل يا بو قلب )ا
يعني تنجّمو تقولو تجربة تدوينية ماهيش دونية.نشا الله بركة ما نكونش عملت الدوانة معا حتّى حد.ما يغرّكمش الشي اللي نكتب فيه.انا راني وليّد عاقل نشرّه و دوبي دوب روحي و نمشي قد قد.لا هكة لا هكة."دايور" يضهرلي كان صدّقني ربي انا اصغر مدوّن في "البلوغوسفير". و مادام حكيت على روحي, فمّا برشة يقراولي و ما يعرفونيش.يا سيدي انا طالب تونسي (بكل ما تنجم توحيلكم بيه كلمة طالب من ... ) ناقم ع الكار الصفرة و الميترو لخضر و كان نلقى نهبطلهم راس في زوز."سيرتو"هاك الاخضر الطويل ولد الكلبة (اهوكة قلت الكلبة موش حاجة اخرى).الله لا تخلّصلو وحلة بجاه سيدي رمضان.اما زادة من ناحية اخرى انا انسان كيوفي الى اقصى الدرجات.وشعاري في الحياة :اذا لقيت الزهو و الطرب لا تبدّلو لا بشقا و لا بتعب
يضهرلي وقيت على طرح "رامي".ايّا مالا انّستو يا جماعة
و نشا الله كل عام و احنا ندولشو في شارع الحرية




3 commentaires:

Anonyme a dit…

ﺇﻦ ﺷﺍﺀ اﻠﻠﻪ ﻜﻝ ﻋﺍﻢ ﻭﻬ blog ﺤﻱ ﺒﺧﻴﺭ ﻭ ﻜﻝ ﻋاﻢ ﻴﺰﻴﺩ ﻴﺘﻄﻭﺭ ﺃﻜﺛﺭ( ﻔﻛﺮﺓ اﻠﻤﻭﺴﻴﻗﻰ اﻠﺘﻤﺨﻭﺭﻴﺔ ﺤﻠﻭﺓ ﺒﺭﺷﺔ vraiment el blog ﺪﺭﺲ ﻠﺻﺤاﻔﺔ اﻠﺗﺧﻠﻒ ﻔﻲ ﺴﻼﺴﺔ اﻷﺴﻠﻭﺐ ﻭ ﺘﺠﺪﯿﺩ اﻠﻤﻭاﻀﯿﻊ .ﻤاﻨﻳﺶ ﺒﺶ ﻨﻌﻤﻝ ﻜﻳﻤ اﺗﻭﻨﺲ7 ﻭ ﻧﻗﻌﺪ ﻨﺸﻜﺭ ﺃﻤا ﻤا ﻋﻨﺪﻱ ﻤا ﻨﻗﻭﻝ ﺣاﺠﺔ ﻭﺤﺪﺓ ﻤاﺫﺒﻳﻙ ﺘﻨﻈﻢ ﻭ ﻗﺖ ﻫﺒﻭﻄ اﻠﺘﺪﻭﻳﻨاﺖ اﻠﺠﺪﺪ . RAÏ

Anonyme a dit…

vraiment el blog mta3ék darss l sahafét etta5llof fi salasét el osloub wou tajdiid el mawathi3. manich bésh na3mél kima tunis7 ou no93éd nochkér ama ma 3andi ma n9oul haja wahda mathébik tnathém wakt tahbit ettadouinét.RAÏ

Anonyme a dit…

هاك أعدمتها المدونة
بالله علااااااااششش؟؟؟؟؟؟؟؟؟؟؟؟؟؟؟؟؟؟؟؟
تخلي فينا من دون موقع تمخويري إفتراضي
raï