dimanche 12 octobre 2008

العالم في ازمة حقيقية و ربي يفرّج عليه

تي هاي كلات بعضها.اما المرّة هاذي يضهرلي الحكاية بلمنجدّ ماهيش تفدليكة.بعد اللي الطشّ وصل حتى للبلوغوسفير.خوكم حلّيت كي الناس الملاح قلت نلقاشي "بوسط" ولاّ ثنين نوسّع عليهم بالي نلقى الدنيا قايمة و قاعدة.و انا خوكم كي الاطرش في الزفّة لا في بالي لا في درايا. وهي طلعت قالّك العالم في ازمة مالية كبيرة ياسر و قالّك زادة اللي ها الازمة هاذي باش تبرّك الاقتصاد متاع باااااااارشة بلدان.و اهوكة الوخيّان المدونين اللي هاذا طاح يحلل و يناقش و يهزّ منّا و يحطّ من غادي.حاسيلو شقلالة كبيرة.الاّ انا خوكم فرايجي في النازلة
اوّلا الساعة ها الازمة المالية ما فيباليش بيها من اصلو على خاطر العطّارة متاع الحومة على حسب ما نعرف ما زادوش في الاسوام.ثانيا انا خوكم اموري تاعبة ياسر في حكاية الفلوس و الاقتصاد متاعي ما يتاثّرش لا من قريب و لا من بعيد لا بازمات و لا هم يحزنون و السبب بسيط ياسر.توّا كي الاقتصاد العالمي سعدو يتكبّ و الدنيا تخلى و جماعة البورصة ريوسهم تتعرّى ماو الشايب وقتها يولّي ينقّصلي في هاك الزوز فرنك اللّي يعطيني فيهم كل راس شهر.اييييه متفاهمين.و لكن اذا ينقصّلي فيهم يولّيو ....حتّى شي.تي بربّي قدّاش هوما باش ينقّص فيهم
و لذا انا نطمّنكم من توّا و نقوللكم تهنّاو. الحومة بخير و خوكم ولد الحومة بخير و الازمة هاذي ماهيش باش تخلطلنا.و مادامها ماهيش باش تخلطلنا فليذهب الجميع الى الجحيم .
و طزّ في...ا

3 commentaires:

Anonyme a dit…

nice as always .RAÏ

Tit@! a dit…

pourvu k ca dur!!!
ama on devré fèr une révolution pr ke el masrouf ya9wa
za7 le baril soumou ta7 et on en a pa bénificié!!!

Anonyme a dit…

simple raï
في الإخًر ما يتحشى كان للأفريك تهنًى