lundi 24 décembre 2007

التدوينة السوداء


على عكس السقنطري متاع ديسمبر اللي لزنا باش نعملو"ركشة جماعية تحت البطانية",الجو في البلوقوسفير سخون ها الايامات والمدونين التوانسة هازين خشمهم على الرقابة (اللي على حسب ما فهمت) حجبت المدونة متاع خونا فري راس".معناها الراجل حاط دم قلبو في مدونة باتت ما صبحت.وجا يضرب عليها ما لقاش ريحتها.ارض و كانتلها بلاعة.لا السما قالت ريت و لا لرض قالت ريت.معناها سي" فري راس" قالولو: ودع حبيبك وانسا هواه.انا الحقيقة مانيش ضد حجب المدونات اذا كان خرجت ع الثنية وبدات تسيب ف الركاكة.اما خونا سي فري راس موش في وجهو, ولد عايلة و لا عملت لا يدو لا ساقو.علاش تقصفولو مدونتو وترصيلو يغني: ضلموني
وعلى عكس التدوينة البيضاء, تدوينتي ليوم سوداء (و كان لقيت لون اغمق م الاكحل راني قلتو) و السبب اللي خلاني نكتبها هو كوني تعديت بالصدفة على قناة7 نلقاهم يعديو في مسلسل الخطاب ع الباب.لامحالة انا حفضتو من كثرة ما عاودوه (وموش محبة فيه اما على خاطر ما لقاو ما يعديو) اما زادة المسلسل هذا واحد من ناس نعتبرو مسلسل يحمم القلب.من شيرة على خاطر يبين اللي و للاسف الشديد ما عنا حتى ذات بشرية تنجم تكتب سيناريو لعمل درامي بخلاف سي علي اللواتي اللي اذا كان ننحيو مسلسلاتو الدراما التونسية تقيد فلسة و تخرج بيدها على راسها.ومن شيرة اخرى على خاطر المسلسل هاذا يذكرني في الحالة المكربة اللي ولات عليها المدينة العربي.المدينة ليوم ولات تسخف الحجر.و في عوض السفساري الحرير و الجبة القمرايا و الشاشية القرمز ولينا نراو في دجين طايح وجوب ميني وشلايك بو صبع
انا باش نعمل دقيقة صمت ترحما على روح المدينة اسكنها الله فراديس جنانه و الهم اهلها( اللي هوما احنا اولاد الحومة) جميل الصبر و السلوان

2 commentaires:

Anonyme a dit…

ahouka 3ad 7attoulek gamret sidi ma7rouss, w si 3li elwati yetfanen!! a3mel jaw

Le sarcastique a dit…

اهيكه ولات " منامة عروسية ... صحة النوم "

مسلسل مافيهش حتى قضية و ما فيه كان التمجديق و الركاكة و تسميع الكلام في " يا بهيم " في " لعنة الله " و زاده فما كلمة تونسية " جديدة لحقيقة ماناعرفش معناها " بالحاط " !!!!

و للا عروسية عامله فيها تقول عليها جماعة المزارعين البيض في الزيمبابوي !!! و جماعة الريف ردوهم تقول عليهم هوايش !!!


علي مراد الله

يوفا مع سطوفا