في تدوينة ليوم حبيت نعطيكم فكرة على السكر اللي تنجم تركبو قناتنا الوطنية ربي يفضلها( و يسامحها) لعبد ذنبو الوحيد كونو حب يتفرج في ماتش كورة
ايا سيدي عشية سبت و الشتا تجبد خيطين من سما, حطيت تونس 7 كي الناس الملاح باش نتفرج في طرح المكشخة و صفاقس.نلقاهم مازالو يعديو في الاشهار.ومن جملة ما عداو اشهار متاع حفلة سمير الوصيف و حضرة رجال تونس.توة الحضرة و فهمناها.اما بجاه ربي منين جاهم" رجال" تونس? اللي يستغل التراث متاع شعب كامل باش يصور بيه زوز فرنك ماهوش راجل و ما يكسابش ريحة الرجولية.و بالتالي سي توفيق دغمان ماذا بيه يسيب عليه م الريق و ينحيها الجبة وينحي معاها الماسك متاع" التونسي الاصيل".على خاطرنا ماناش سيدي تاتا وموش بالساهل باش واحد استغلالي كيفو يعديها علينا.و اللي قالتلهم اسكتو: اسم العرض" الحلفاوين".مسكينة الحلفاوين.تكب سعدها و قريب نتكبو احنا معاها.كان فيها سيدي علي الرياحي و صليحة و رضا القلعي يصولو و يجولو.وتوا" رجال" (وناكد ع المعقفين) تونس و سمير الوصيف.و برا عاد البومزيود خدام و الشقوفات تتناطر تقولش عليها حرب.واش باش يفضها.موش عيب هاذا? موش شي ينطق م الاجناب? ويحبوني نسكت
نرفض يا سي الكافي.نرفض و نزيد نرفض
ما نطولش عليكم طارتلي و جيت باش نسكر جد بوها التلفزة و من بعد نعلت الشيطان و قلت ما دام الشعب يموت ع الشطيح و الرديح ما عنا ما نعملولو.هاذيكا مغرفتنا اش هزت.و على كل حال واحد يوسع بالو و ما يفلتش طرح سخون كيف هاذا
المهم.الماتش طلع ملذذ.موش سخون كيما تصورتو.اما خير من بلاش.حتى لين جات اللقطة اللي تضرب فيها الملاعبي متاع صفاقس.هي لامحالة تظهر اصابة عادية متاع ملاعبي متاع كورة.اما كيف زدت ثبت فيها ريت القصبة متاع ساقو مقسومة في ثنين.يضهرلي فيهم الجماعة شاهين الهرقمة.انا واحد من ناس حياتي كاملة ناكل فيها بقصبة بقري و ما عمري ما جربتها بقصبة متاع عبد.الحاسيلو جات الطامة و العامة و كلات بعضها بونية و كف ومن بعد جات كرهبة الحماية هزت الملاعبي هو و شطر ساقو و طارو بيهم للكلينيك.ايا قلنا ما صار باس و انشا الله لاباس و نرجعو للماتش متاعنا.و اذا بيهم الملاعبية متاع صفاقس لا طاح لا دزوه قالك ماناش مكملين الماتش.علاش? كيفاش? الله اعلم.ناس قاصة تساكر و ناس الله اعلم بيها اش عملت باش تتفرج.و الجماعة حلفو بيمين ع الماتش لا يكملوه
ما نطولش عليكم.سكرت التلفزة و رقدت.و ق ناتنا امسح مات عليها.و شعفة يا داود كان مازلت نعاود
7 commentaires:
هـهــــه
منو هكه ما تحلش التلفزة قبل الماتش، ما يسالش كيف تفلت دقيقة و إلا اثنين و إلا حتى درج، ع الأقل تضمن انك م يطلعلك السكر كان وقت الماتش، مش من قبل ما يبدى
و لو اني ما نراش ذنب للتلفزة في الشي اللي صار وقت الماتش، لكني نعيب ع المذيعين متاعنا السلبية متاعهم و قت المباراة (يعني ما قيها باس كيف المذيع يحل فمو و يحكيلنا ع الشي اللي قاعد يصير، مش لازم يكون ناس ملاح و ما يحبش يضر حتى حد، ع الأقل ما يظهرلناش دلهة ماهو فاهم حتى شي م الهدرة)
بالنسبة لحكاية أمسح و مات، يظهرلي صعيبة شوية، الكلنا قلناها و داود ماعادش تجد عليه الوعود متاعنا هذي
بالنسبة للجبة هذاك ماعون صنعة،الناس تمشي من القلق وبرى عندكشي عندي.
تعرف مرة سمير جانا للحومة في اطار احياء عرس متاع واحد غبار في الطليان وفات الحفلة بعركة ووقع احتجازو في الدار (كان خرج راو شلطوه) لحين قدوم الشرطة باش منعتو.
من وقتها حالف على حفلات المزود.
بالنسبة لقناة سبعة......بدون تعليق.
هاو عندك زوار من اسرائيل....هههههههه
و اللاهي انا بيدي ما فهمتش الزوار من اسرائيل اش يعملو في محلي(نقصد في مدونتي ) .زعمة زمقري عايشين في اسرائيل بالكشي.اشكون يعرف ع البلا.في وقتنا توة ما عاد تستغرب شي مادام سي سمير الوصيف يغني مرة فوق السطوحات و مرة في الزينيت.الدنيا تقلبت سليختها و الواحد ماعادش ينجم يعرف راسو من ساقيه كان بسيدي و سيدك.ربي يقدر الخير و اكهو
سي عمروش نشاالله تقعد وفي لمدونة و تطربني بتعليقاتك و حتى كان لقيتني نهز و نصبت ما تاخذش عليا و احسبني خوك الصغير
ياراجل تو هذا حديث...وخيان واحباب واصحاب.
معا لاجل البهامة والتسطيكة.
هذيكة الموساد يلوجو على البرباش وصاحبو تيتوف.
تحياتي.
عمروش: ما يزيناش الرّافل، كمل علينا الموساد ضربة واحده
حبيت نقول معا للتخلص من البهامة.
Enregistrer un commentaire